Կադիրովն ԱՄՆ-ից «լավ տղաների» կհրավիրի հատուկ նշանակության ուժերի պատրաստման կենտրոն
Չեչնիայի ղեկավար Ռամզան Կադիրովը հայտարարել է, որ հատուկ նշանակության ուժերի պատրաստման միջազգային ուսումնական կենտրոն ամերիկացիներ կհրավիրվեն: Այդ մասին նա հայտարարել է interfax.ru-ին տված հարցազրույցում:
«Նախատեսվում է սկզբնական փուլում հրավիրել մինչև 200 մարզչի: Նրանք աշխարհում լավագույն մասնագետներն են»,- նշել է Կադիրովը:
«Չի կարելի հերքել այն փաստը, որ ԱՄՆ-ում կան իսկապես զիլ տղաներ՝ Լատինական Ամերիկայում, Ասիայում, Աֆրիկայում հատուկ գործողություններին մասնակցության փորձով»,- ընդգծել է Չեչնիայի ղեկավարը:
Խոսքը հենց մասնավոր գործակալությունների մասին է: «ԱՄՆ պաշտոնական կառույցները մեզ մոտ Չեչնիայում պատժամիջոցների տակ են»,- հավելել է նա:
Հատուկ նշանակության ուժերի միջազգային ուսումնական կենտրոնի կառուցումն իրականացվում է Գուդերմես քաղաքում՝ ավելի քան 400 հեկտար տարածքում: Այն իրենից ներկայացնում է 95 շինություններից բաղկացած բազմաֆունկցիոնալ համալիր:










