Պուտինի գործունեության հավանության վարկանիշը հասել է տարվա ընթացքում առավելագույն ցուցանիշի

14:07 • 24.11.16

Ռուսաստանի Դաշնության նախագահ Վլադիմիր Պուտինի գործունեության հավանության վարկանիշը նոյեմբերին հասել է 82,6 տոկոսի: Դա 2015 թվականի նոյեմբերից (87%) ի վեր գրանցված առավելագույն ցուցանիշն է:


Կառավարության աշխատանքի գնահատականն աճում է երրորդ ամիսն անընդմեջ և նոյեմբերին կազմում է 60,2 տոկոս: Այդ մասին վկայում են Հանրային կարծիքի ուսումնասիրման համառուսաստանյան կենտրոնի անցկացրած հարցման արդյունքները, գրում է «ՌԻԱ Նովոստի»-ն:


Հետազոտության համաձայն՝ Պետդումայի գործունեության հավանության հարցի վերաբերյալ դրական դինամիկան գրանցվում է հոկտեմբերից: Նոյեմբերին այն կազմում է 47,7 տոկոս: Ռուսաստանցիների մոտ կեսը նաև հավանության է արժանացրել Դաշնային խորհրդի աշխատանքը (46,6 տոկոս):


Հանրային ինստիտուտների շրջանում վերջին ամսվա ընթացքում էական տատանումներ տեղի չեն ունեցել: Ռուսները շարունակում են առավելագույն աջակցություն ցուցաբերել և հավանության արժանացնել բանակին (82,8 տոկոս), ինչպես նաև Ռուս ուղղափառ եկեղեցուն (71,2 տոկոս), զանգվածային լրատվամիջոցներին (62,5 տոկոս):