«Բանակցելու և համոզելու արվեստ» թեմայով նոր դասընթաց Հայաստանի ՓՄՁ-ների համար
«Ի-Վի Քոնսալթինգ» ընկերությունը, Հայաստանի ՓՄՁ ԶԱԿ-ի և գործընկեր կազմակերպությունների կողմից ԱՄՆ ՄԶԳ ֆինանսավորմամբ իրականացվող «Գործընկերություն՝ հանուն գյուղական համայնքների բարգավաճման» (USAID/PRP) ծրագրի շրջանակում իրականացրեց «Բանակցելու և համոզելու արվեստ» թեմայով վերապատրաստման անվճար դասընթաց:
Դասընթացի նպատակն էր նպաստել ծրագրի շահառու ձեռներեցների և ընկերությունների ղեկավարների բանակցային կարողությունների և հմտությունների զարգացմանը: Սեմինարը կազմված էր 2 հիմնական թեմաներից` «Բանակցության հիմնարար հմտություններ», «Համոզելու սկզբունքներ և հնարքներ»: Դասընթացը վարում էր «ԼեգալԼաբ» իրավաբանական ընկերության հիմնադիր և «Բանակցությունների վարման երևանյան կենտրոնի» (CEN Yerevan) տնօրեն Ստեփան Խզրթյանը:
«Բանակցել` արդյունավետ համագործակցության նպատակով» բաժնի նպատակն էր վերափոխել մասնակիցների պատկերացումները բանակցության մասին: Բանակցությունը ոչ թե «սեփական ճիշտը» ամեն գնով պնդելու վարժանք է, այլ նախևառաջ դիմացինին համոզելու և առկա խնդրին փոխշահավետ լուծում տալու արվեստ: Մասնակիցները ստացան հմտություներ, որոնց միջոցով կկարողանան առավել արդյունավետ վերլուծել իրավիճակը, հասկանալ ներգրավված կողմերի հետաքրքրությունները և մտահոգությունները, առավել գրագետ նախապատրաստվել բանակցությանը և առաջարկել ուղիներ` խնդիրը լուծելու համար:
«Համոզել այնպես, որ դիմացինի շահերը բավարարվեն»: Այդ մասում ձեռներեցները սովորեցին, թե ինչպես համոզել, որ դիմացինը իրենց զգա գնահատված և շահերը` բավարարված: Թեպետ յուրաքանչյուրն ունի համոզելու իր մոտեցումներ, սակայն դրանք հաճախ համակարգված չեն կամ ոչ միշտ են էթիկապես ընդունելի: Սեմինարը ներկայացրեց համոզելու էթիկապես ընդունելի և միաժամանակ ազդեցիկ հնարքները և տվեց հնարավորություն` դրանք դերախաղերի միջոցով գործի դնելու և փորձարկելու: Դասընթացը շեշտադրում կատարեց հատկապես վաճառքի իրականացման ընթացքում համոզելու գործընթացի վրա:
2013 թ. սեպտեմբերից Հայաստանում մեկնարկել է ԱՄՆ միջազգային զարգացման գործակալության «Գործընկերություն` հանուն գյուղական համայնքների բարգավաճման» (USAID PRP) հնգամյա ծրագիրը: Հայաստանի ՓՄՁ զարգացման ազգային կենտրոնի գլխավորությամբ ծրագիրն իրականացնում են «Ի-Վի Քոնսալթինգ» կազմակերպությունը, Գեղարքունիքի առևտրաարդյունաբերական պալատը և «Ագրոբիզնեսի և գյուղի զարգացման կենտրոնը» (CARD):
USAID PRP ծրագրի հետ կապված հարցերի համար կարող եք կապվել՝ «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամ (Հայաստանի ՓՄՁ ԶԱԿ) ։














