Ես ցնցված եմ, կորցրել եմ մտերիմ ընկերոջս. ինչպես են Էլթոն Ջոնն ու մյուս հայտնիներն արձագանքել Ջորջ Մայքլի մահվանը

Համաշխարհային ճանաչում վայելող բրիտանացի երգիչ Ջորջ Մայքլի մահվան լուրն անսպասելի էր ոչ միայն միլիոնավոր երկրպագուների, այլև՝ աստղի հայտնի գործընկերների համար:

Ինչպես նշում է The Daily Mail-ը, մասնավորապես՝ բրիտանացի երաժիշտ Էլթոն Ջոնն Instagram-ում հրապարակել է իր ու հանգուցյալի համատեղ լուսանկարը՝ հետևյալ գրությամբ. «Ես ցնցված եմ: Կորցրել եմ սիրելի ընկերոջս՝ ամենաբարի, ամենամեծահոգի մարդուն, ով նաև հոյակապ արտիստ էր: Սրտով նրա ընտանիքի ու հարազատների հետ եմ»:

Հիսուներեքամյա արտիստի մահվանն են անդրադարձել նաև Բոյ Ջորջը, Մադոննան, Ջերի Հելոուիլը, Էնդրյու Ռիջլին, Ջոն Նյումանը, Միկան ու այլ հայտնի երաժիշտներ, որոնք սոցցանցերում կիսվել են Ջորջ Մայքլի հետ ունեցած լուսանկարներով:

«Եվս մի հրաշալի արտիստ լքեց մեզ»,-գրել է Մադոննան:

Ինչպես ավելի վաղ հայտնել էր Tert.am-ը, երաժշտի մենեջեր Մայքլ Լիփմանը տեղեկացրել է, որ Ջորջ Մայքլը մահացել է սրտի անբավարարությունից: Աստղը մահացել է Օքսֆորդշիրում գտնվող իր տանը՝ անկողնում պառկած:

Դեպքի վայր ժամանած ոստիկանների փոխանցմամբ՝  երգչի մահվան առնչությամբ կասկածելի հանգամանքներ չկան:

Նշենք, որ Ջորջ Մայքլը, ով ծագումով հույն էր, համարվում է ամենահաջողակ փոփ երգիչներից մեկը. նա իր երաժշտական կարիերայի ընթացքում վաճառել է ավելի քան 100 մլն ձայնասկավառակ:

1987 և 1988թթ. բրիտանացի երգիչն արժանացել է 2 «Գրեմմի» մրցանակի: