Կադիրովը Չեչնիայի մանկական հիվանդանոցը վերանվանել է ավիաաղետի հետևանքով զոհված Բժիշկ Լիզայի պատվին
Չեչնիայի Հանրապետության ղեկավար Ռամզան Կադիրովը որոշում է կայացրել Գրոզնիում գտնվող հանրապետական մանկական կլինիկական հիվանդանոցն անվանակոչել Սոչիում Տու-154 ինքնաթիռի կործանման հետևանքով զոհված Ելիզավետա Գլինկայի (հայտնի է որպես Բժիշկ Լիզա) պատվին: Այդ մասին նա հայտնել է Instagram-ում, գրում է lenta.ru-ն:
«Նա իր կյանքը նվիրել է ամենաազնիվ գործին՝ թեժ կետերում երեխաների փրկությանը: Ունենալով հիանալի բժշկական կրթություն՝ նա կարող էր հանգիստ աշխատել ինչ-որ հիվանդանոցում, բայց Ելիզավետա Պետրովնան ընտրել է բարդ ճանապարհը՝ օգնելու համար նրանց, ովքեր որևէ տեղից օգնություն չեն սպասում»,- նշել է Չեչնիայի ղեկավարը:
Կադիրովը նաև Ռուսաստանի համար ծանր կորուստ է անվանել Ալեքսանդրովի անվան երգի և պարի անսամբլի անդամների մահը:
Ավելի վաղ հայտնի է դարձել, որ Սև ծովում կործանված Տու-154 օդանավում է եղել Ռուսաստանում հայտնի քաղաքացիական ակտիվիստ, «Արդար օգնություն» հիմնադրամի ղեկավար, բարեգործ Ելիզավետա Գլինկան։
Հիշեցնենք, որ Տու-154 օդանավը կործանվել է Սոչիում երեկ առավոտյան: Ինքնաթիռում գտնվել է 92 մարդ, նրանցից 8-ը` անձնակազմի անդամ։ Ուղևորների թվում են եղել 9-ը ռուսաստանցի լրագրող և Ալեքսանդրովի անվան երաժշտական անսամբլի անդամները, որոնք ուղևորվում էին Սիրիայի «Հմեյմիմ» ավիաբազայի տարածքում գտնվող ռուս զինվորների Ամանորը շնորհավորելու նպատակով կազմակերպված միջոցառմանը մասնակցելու:










