Բրազիլական «Շապեկոենսե» թիմին տեղափոխող ինքնաթիռի կործանման հարցում մեղավոր է ճանաչվել օդաչուն

11:47 • 27.12.16

Կոլումբացի քննիչները հայտնել են, որ նոյեմբերի վերջին Բոլիվիայից կոլումբական Մեդելյին քաղաք թռչող ինքնաթիռի կործանման հարցում, որը տեղափոխում էր «Շապեկոենսե» բրազիլական ֆուտբոլային թիմին, մեղավոր է եղել օդաչուն, գրում է BBC-ի ռուսական ծառայությունը:


Հետաքննության արդյունքներով քննիչները եկել են եզրակացության, որ ինքնաթիռն ամբողջությամբ սարքին է եղել: Տեղի ունեցածի համար մեղավոր են ճանաչվել օդաչուն, LaMia ավիաընկերությունը և բոլիվիական կարգավորող մարմինները:


Քննիչների տվյալներով՝ օդաչուն չի խնդրել թռիչքից առաջ ինքնաթիռը վերալիցքավորել, ինչպես նաև չափազանց ուշ է հայտնել, որ շարժիչները չեն աշխատում, երբ դրանք սկսել են անջատվել վառելիքի պակասի պատճառով:


Բացի այդ, քննությունը հայտարարել է, որ ավիաընկերությունը և Բոլիվիայի ավիացիոն իշխանությունները հաստատել են թռիչքը՝ չնայած առկա խախտումներին: Ինքնաթիռը գերբեռնված է եղել և թռչելիս է եղել շատ ավելի բարձր, քան դա թույլ էին տալիս տեխնիկական բնութագրերը:


Մինչ այդ օդաչուի և ավիաընկերության պատասխանատվության մասին հայտարարել էին բոլիվիացի քննիչները՝ չհիշատակելով, սակայն, Բոլիվիայի ավիացիոն իշխանություններին: Ընկերության ղեկավարը և նրա որդին արդեն ձերբակալվել են:


LaMia ընկերության ինքնաթիռը, որով «Շապեկոենսե» թիմը թռչում էր Հարավային Ամերիկայի գավաթի եզրափակիչի առաջին խաղին, կործանվել է նոյեմբերի վերջին: Ինքնաթիռում է եղել գրեթե ողջ թիմը, ինչպես նաև լրագրողներ և անձնակազմի անդամներ: Փրկվել է միայն 5 մարդ։