Թուրքիան ՇՀԿ-ին անդամակցելու դիմում չի ներկայացրել. Ղազախստանի ԱԳՆ
Շանհայի համագործակցության կազմակերպությանն անդամակցելու համար Թուրքիայից պաշտոնական դիմում չի ստացվել: Այդ մասին հայտարարել է Ղազախստանի արտգործնախարար Երլան Իդրիսովը, գրում է «ՌԻԱ Նովոստի»-ն:
«Ինչ վերաբերում է ՇՀԿ-ին Թուրքիայի անդամակցությանը, ապա դա նախևառաջ հենց Թուրքիայի որոշումն է, Թուրքիայից դեռևս պաշտոնական դիմում չկա: Կազմակերպություն այս կամ այն երկրին ընդունելու հարցը որոշում են ՇՀԿ բոլոր անդամները: Պետք է այդ հարցի շուրջ ձևավորվի փոխհամաձայնություն: Դուք լսել եք ԶԼՄ-ների հաղորդագրությունների մասին, բայց դա պաշտոնական դիմում չէ: Դա հավանաբար եղել է բարձրաձայն արտահայտված միտք: Դրանց, իհարկե, ուշադրություն դարձվել է»,- ասել է Իդրիսովը ճեպազրույցի ժամանակ:
Նա նշել է, որ «միտքը բարձրաձայնելու և պաշտոնական դիմումի ու անդամ դարձնելու միջև մեծ հեռավորություն կա»:
«Այստեղ կարևոր է Թուրքիայի հստակ ձևակերպված մտադրությունը, ցանկությունը: Դուք գիտեք, որ այդ հարցն այնքան էլ պարզ չէ՝ հաշվի առնելով Թուրքիայի եվրոպական ձգտումները»,- ասել է Իդրիսովը:
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ ԵՄ-ին անդամակցությունը երկրի համար միակ տարբերակը չէ, Անկարան քննարկում է ՇՀԿ-ին անդամակցության հարցը: Միավորման գլխավոր քարտուղար Ռաշիդ Ալիմովը, մեկնաբանելով ՇՀԿ-ին Թուրքիայի միանալու հնարավորությունը, ասել էր, որ Շանհայի համագործակցության կազմակերպությունը չունի արագ ընդլայնվելու նպատակ:
Հիշեցնենք, որ 2001 թվականին հիմնված ՇՀԿ-ի անդամներ են Ռուսաստանը, Չինաստանը, Ղազախստանը, Ղրղզստանը, Տաջիկստանը, Ուզբեկստանը և այլն։ Երկխոսության մեջ գտնվող գործընկեր երկրներն են Հայաստանը, Ադրբեջանը, Կամբոջան, Նեպալը, Թուրքիան և Շրի Լանկան:










