Ուկրաինան արգելել է ռուսական «Дождь» հեռուստաալիքի հեռարձակումը
Ուկրաինայի հեռուստառադիոհեռարձակման հարցերով ազգային խորհուրդն արգելել է ռուսական «Дождь» հեռուստաալիքի հեռարձակումը՝ ուկրաինական սահմանադրությունը խախտելու պատճառով: Այդ մասին հեռուստաալիքին հայտնել է «Воля» պրովայդեր ընկերության ներկայացուցիչը, գրում է tvrain.ru-ն:
«Воля» պրովայդեր ընկերության ներկայացուցիչ Օքսանա Վեսյոլովայի խոսքով՝ ուկրաինական սահմանադրությանը համապատասխանող բովանդակություն ունեցող արտասահմանյան ծրագրերից «Дождь» հեռուստաալիքը հանելու մասին որոշումը կայացվել է հունվարի 12-ին Ազգային խորհրդի նիստին: Պաշտոնական փաստաթուղթը կհրապարակվի հունվարի 16-ին: Այդ պահից ի վեր օպերատորները կունենան մեկ ամիս ցանցերից ալիքը հանելու համար:
Վեսյոլովայի խոսքով՝ երկրի տարածքում ալիքի հեռարձակումն արգելվել է եթերում կոմերցիոն գովազդի տեղադրման պատճառով, ինչն արգելվում է ուկրաինական սահմանադրությամբ՝ օտարերկրյա հեռուստաալիքների եթերի դեպքում: Բացառություն են Եվրամիության անդամ պետությունների կամ Անդրսահմանային հեռուստատեսության մասին եվրոպական հռչակագիրը վավերացրած պետությունների իրավասության տակ ընկնող ալիքները:
«Интерфакс»-ը, վկայակոչելով Ազգային խորհրդի անդամներից մեկին, նշել է հեռուստաալիքի հեռարձակման արգելքի մեկ այլ պատճառ: Գործակալության տվյալներով՝ հեռուստաալիքը խախտել է երկրի օրենքը՝ հեռարձակելով տեղեկատվություն, որը չի ճանաչում Ուկրաինայի տարածքային ամբողջականությունը: Հեռուստաալիքը Ղրիմը պատկերում է որպես Ռուսաստանի տարածք:










