Կադիրովը հայտարարել է Չեչնիայում ԻՊ-ի խմբի ջախջախման մասին (տեսանյութ)

17:33 • 15.01.17

Չեչնիայի ղեկավար Ռամզան Կադիրովը հայտարարել է խմբի չեզոքացման մասին, որը, նրա խոսքերով, կապված է եղել «Իսլամական պետություն» ծայրահեղական խմբավորման հետ, հայտնում է BBC-ի ռուսական ծառայությունը: Instagram-ի իր էջում նա տեսանյութ է հրապարակել, որը նկարահանվել է խմբավորման ենթադրյալ անդամի ձերբակալությունից հետո:


Կադիրովը, ով տեսանյութում զրուցում է ձերբակալվածի հետ, պնդում է, որ նա վտանգավոր ծայրահեղական Իմրան Դացաևն է, ով ներգրավված է 2016 թվականի աշնանը տեղի ունեցած ոստիկանության ավագ սերժանտի սպանությանը:


Չեչնիայի ղեկավարի տվյալներով՝ Դացաևին հաջողվել էր փախչել հունվարի 11-ին անցկացված հատուկ գործողության իրականացման ընթացքում, բայց այս գիշեր արգելափակվել է Գրոզնիում, դիմադրություն է ցույց տվել ոստիկանությանը և այնուհետև ձերբակալվել է: Կադիրովի խոսքերով՝ Դացաևը սպանել է ոստիկանին ջիհադիստների հրամանով՝ «նրանց վստահությանն արժանանալու համար»:


Չեչնիայի ղեկավարը նաև հայտարարել է Նալչիկում խմբի ևս երկու ենթադրյալ անդամի ձերբակալության մասին:


«Այս պահին ողջ հանցախումբը չեզոքացվել է, ոստիկանության բաժիններ է տեղափոխվել ավելի քան 50 մասնակից»,- գրել է Կադիրովը:


Նշվում է, որ Կադիրովի տեղեկություններով` հանցագործները պատրաստվում էին «զոհերի առավելագույն քանակությամբ խոշորամասշտաբ ահաբեկչություններ իրականացնել»: