Ժիրինովսկին հերքել է լուրերն այն մասին, թե նա առաջարկել է Բելառուսին մտնել Ռուսաստանի կազմի մեջ
Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին հերքել է լուրերն այն մասին, թե նա առաջարկել է Բելառուսին միանալ Ռուսաստանի Դաշնությանը:
«Լրագրողները ներկայացնում են, թե ես առաջարկել եմ Բելառուսին մտնել ՌԴ կազմի մեջ: Ես որևէ նման առաջարկ չեմ արել», - ասել է Ժիրինովսկին:
Նա բացատրել է, որ իրենց կուսակցության 30-րդ համագումարին նա, խոսելով Բելառուսի` ռուսական գազի վերաբերյալ գնային պահանջներից, նշել է, որ եթե Բելառուսը ցանկանում է ներքին գներով ձեռք բերել ռուսական գազը` պետք է միանա Ռուսաստանին:
«Դառնում եք մեր երկրի մասն ու ունենում եք անվտանգություն ու ներքին գներ: Ոչ մի երկիր չի վաճառելու օտարերկրացիներին իր ապրանքը ներքին գներով», - ասել էր Ժիրինովսկին:
Ավելի վաղ քաղաքական գործիչը նշել է, որ Բելառուսի նախագահ Ալեքսանդր Լուկաշենկոն «հնարավոր ամեն բան պոկեց Ռուսաստանից» և այդ ամենի հետ մեկտեղ՝ անկախ երկիր է ցանկանում մնալ, իսկ ռուսական ապրանքների գները` ներքին գնացուցակով:










