ՀՀԿ ընտրացուցակների շուրջ քննարկումները շարունակվում են, մոտեցումները վերջնական չեն. Հովհաննես Սահակյան

14:59 • 08.02.17

Իշխող «Հանրապետական» կուսակցությունը չի շտապում բացել փակագծերը, թե ովքեր են ընդգրկված լինելու առաջիկա խորհրդարանական ընտրությունների Հայաստանի Հանրապետական կուսակցության համամասնական ու ռեյտինգային ցուցակներում: Այսօր լրագրողների հետ զրույցում ԱԺ «Հանրապետական» խմբակցության պատգամավոր Հովհաննես Սահակյանն ասաց, որ որոշակի հստակություն հայտնի կլինի առաջիկայում:

«Կենտրոնական ընտրական հանձնաժողովը սահմանել է ընտրացուցակները ներկայացնելու ժամկետ: Մենք մեր բոլոր քայլերը կազմակերպում ենք այդ ժամկետի շրջանակներում: Այս պահին որևէ հստակություն չկա: Յուրաքանչյուրն իր ընտրատարածքում, ծննդավայրում, որոշակի աշխատանքներ տանում է, հասկանում են՝ հնարավո՞ր է առաջադրվեն, թե ոչ: Բայց սա պաշտոնական բնույթ չի կրում»,- նշեց պատգամավորը:

Tert.am-ի հարցին՝ ի վերջո համամասնական ցուցակը ո՞վ է գլխավորելու, արդյո՞ք Նախագահ Սերժ Սարգսյանը, Հ. Սահակյանը կրկին հորդորեց սպասել:

«Հանրությանը մենք մեր ցուցակը կներկայացնենք, թե ով է գլխավորելու այն, ով է լինելու շտաբի ղեկավարը, ովքեր են առաջադրվելու ռեյտինգային ցուցակով, ինչ մարտավարություն ենք ընտրելու, ժամկետի սահմաններում կներկայացնենք: Քանի որ քննարկումները շարունակվում են, մոտեցումները վերջնական չեն, հստակ չեն, ճիշտ չէ հայտարարություն անելը»,- հավաստիացրեց Հովհաննես Սահակյանը:

Ընտրություններից առաջ ՀՀԿ-ն լքած անձանց մասին լրագրողները հարցրին, թե ՀՀԿ-ն ցավո՞ւմ է այս ամենի համար, թե՞ դիտարկում որպես առողջացման գործընթաց:

Ի պատասխան պատգամավորն ասաց, որ նախկին վարչապետ Հովիկ Աբրահամյանը, ով դուրս եկավ ՀՀԿ-ից և ում հետևից դուրս եկան շուրջ 13 հոգի, մեկնաբանվել է կուսակցության կողմից, եղել է պատասխան, որ ցանկացած կուսակցական ինքն է որոշում՝ ինչպես մասնակցել ընտրություններին:

«Ժամանակը ցույց կտա՝ սա թուլացման, թե առողջական պրոցես է: Այն մոտեցումները, որոնք մենք որդեգրել ենք, որոնք ներկայացնելու ենք հանրությանը, ընդունելի են մեր կուսակիցների համար: Մենք կողմնակից ենք, որ ընտրական գործընթացները ընթանան բացառապես օրենքի տառին ու ոգուն համապատասխան»,- մանրամասնեց Սահակյանը: