Հայ համայնքի ընթրիքը, ինչպես Օլանդը նշեց, «հիշատակի հանդիպում» էր, քաղաքական հարցեր չքննարկվեցին․ ֆրանսահայ հասարակական գործիչ
Ֆրանսիայի հայկական համայնքը բավականին ազդեցիկ է, սակայն այդ ազդեցիկությունը չդրսևորվեց Ֆրանսիայի հայկական ընկերությունները համակարգող խորհրդի (CCAF-ի) կազմակերպած փետրվարի 8-ի ընթրիքի ժամանակ, որին ներկա էր Ֆրանսիայի քաղաքական վերնախավը՝ ի դեմս նախագահ Ֆրանսուա Օլանդի: Այս տեսակետը հայտնեց Ֆրանսիայի հասարակական գործիչ Արման Ավագյանը՝ նշելով, որ ինքը ընթրիքին հնչած հայտարարություններին հետևել է ուղիղ եթերով, անձամբ ընթրիքին չի կարողացել մասնակցել, քանի որ վատառողջ է եղել:
«Համայնքն ամեն տարի կազմակերպում է այդ ընթրիքը: Հրավիրվում են ֆրանսիական քաղաքականության առաջնակարգ դեմքերը: Դատելով այնտեղ հավաքված մարդկանցից՝ այն պետք է կրի լոբբիստական բնույթ, ծառայի ֆրանսահայերի առջև դրված ծրագրերի իրականացմանը, բայց այս անգամվանը, ինչպես Ֆրանսիայի նախագահ Ֆրանսուա Օլանդը նշեց, «հիշատակի հանդիպում» էր: Այդպես էլ կար, ցավոք սրտի եմ ասում՝ դա հիշատակի երեկո էր»,- ասաց Արման Ավագյանը:
Նա պատմեց, որ Ֆրանսուա Օլանդը, չնայած որ վերջին անգամն էր որպես նախագահ ներկա ընթրիքին, վստահեցրեց, որ հաջորդներին ևս կգա։
«Նա նաև ասաց, որ ընթրիքը հայ համայնքի՝ Ֆրանսիայի հավատարմության նշանն է»,- պատմեց Արման Ավագյանը՝ հավելելով, որ ընթրիքը քաղաքական հարթակում որևէ լուրջ խնդիրներ առաջ չբերեց:
Արման Ավագյանը նշեց, որ Օլանդը խոսել է Ցեղասպանության ժխտումը քրեականացնող հոդվածի մասին, որը Ֆրանսիայի Սահմանադրական դատարանը մերժեց:
«Դրան ի պատասխան՝ նա առաջարկեց, որ մոտ ժամանակներս Ֆրանսիայում լինի ցեղասպանությունների, մարդկանց դեմ իրականացված ոճիրների հիշատակման օր, որը կներառի նաև Հայոց ցեղասպանությունը: Նախագահը հիշատակեց, որ իր համար կարևոր են Հայաստանը և Լեռնային Ղարաբաղը, հիշեցրեց, որ այս տարի Հայաստանի և Ֆրանսիայի դիվանագիտական հարաբերությունների 25-ամյակն է և դրա առթիվ մարտի 8-ին նա Հայաստանի Նախագահին է հրավիրել Փարիզ, որի ժամանակ կքննարկվեն մշակութային և տնտեսական հարցեր, ինչպես նաև՝ կնախանշվի, թե ինչպես կարելի է լուծել Լեռնային Ղարաբաղի հիմնախնդիրը»,- պատմեց Արման Ավագյանը՝ հավելելով, որ նաև Փարիզի քաղաքապետը խոստացավ Թուրքիայի Մեջլիսի հայազգի պատգամավոր Կարո Փայլանին Փարիզի մեդալ շնորհել:
Ըստ նրա՝ այնուամենայնիվ երեկոյին հնչած բոլոր հայտարարությունները դեկլարատիվ բնույթ են կրել, քաղաքական լուրջ քննարկումներ չեն եղել: Արման Ավագյանը նշեց, որ աջակողմյաններից Ֆրանսիայի նախագահի թեկնածու Ֆրանսուա Ֆիյոնը պետք է գար, սակայն հենց ընթրիքի օրը՝ ժամը 6-ին, չեղարկել էր իր մասնակցությունը, իսկ ձախակողմյանների թեկնածու Բենուա Ամոն եկել էր, սակայն ելույթ չունեցավ:
«Շատ տարօրինակ էի, բայց չխոսեց հայերի բարեկամ, պատգամավոր Վալերի Բուայեն՝ աջակողմյանների ներկայացուցիչներից, ինչպես նաև՝ Ֆրանսուա Ֆիյոնի աջ ձեռքը նրա նախընտրական արշավում»,- նշեց նա:
Արման Ավագյանն ասաց, որ ոչ ոքի աշխատանքը չի ցանկանում թերագնահատել, սակայն չի կարող նկատել, որ կազմակերպված հավաքույթին, բացի «սելֆիներից» ու փոխադարձ ժպիտներից, ոչ մի լուրջ աշխատանք չկար:
«Ընթրիքը լավագույն միջոցն էր, որով պետք է հասկացվեր, որ մենք գործուն ենք: Հատկապես նախընտրական տարում: Ընտրությունները երկու ամսից են, իսկ դրանք շատ կարևոր են, որովհետև նախագահն ունի շատ ֆունկցիաներ: Մեր համայնքային ուժն այդ ընթրիքի ընթացքում չտեսա,- ասաց նա՝ հավելելով, որ կցանկանար, որ ընթրիքին առավել շատ քաղաքական բովանդակությամբ ելույթներ լինեին,- կուզեի ավելի կոնկրետ և շոշափելի լինեին Ֆրանսիայի քաղաքական գործիչների առաջարկները հայերին: Մտահոգված էի, որ ո՛չ աջակողմյան, ո՛չ էլ ձախակողմյան թևից նախագահի թեկնածուները ելույթ չունեցան, որևիցե խոստումներ, թեկուզ Ցեղասպանության ժխտումը քրեականացնող հոդվածի մերժման հետ կապված չեղան»:










