Ակցիա իրականացնող սևազգեստ մայրերից մեկը պնդում է, որ կառավարության շենքի մոտ ոստիկանները թքել են իրենց վրա
Այսօր կառավարության շենքի դիմաց հավաքված, իրենց խնդիրների մասին բարձրաձայնող քաղաքացիների թվում էին նաև խաղաղ պայմաններում զոհված զինվորների մայրերը, որոնք պահանջում էին հանդիպում պաշտպանության նախարար Վիգեն Սարգսյանի հետ:
Նրանցից Իրինա Ղազարյանը Tert.am-ին հայտնեց, որ երբ կառավարության ներկայացուցիչը հայտնել է, որ իրենց գործերը «կնայի» գլխավոր դատախազը` Արթուր Դավթյանը, իրենցից Նանա Մուրադյանը փորձել է առաջ գնալ, ինչին անմիջապես արձագանքել է ծառայություն իրականացնող ոստիկանը:
«Ագրեսիվ ոստիկանը բոթելով քաշում ա, թքում ա սպանված զինվորի մոր երեսին, ասում է` «բոմժ»։ Հասնում եմ էն պահին, որ էս տականքը գոռում ա՝ տարեք դրան բաժին, հլը իրա հալը կտենա: Նանաս վատացել ա, դողացնում ա, էդ պահին կառավարության մոտ մի ուրիշ ոստիկան կար, ակնոցավոր, ռացիայով ասում է՝ դադարեցրեք: Հետո էդ ոստիկանին տարան մի կողմ, նոր ոստիկաններ եկան, Նանան վատ է»,-մանրամասնեց Իրինա Ղազարյանը:
Սրանից հետո արդեն, կնոջ խոսքով, իր վրա է թքել մի ուրիշ ոստիկան, երբ ինքը ասել է. «Չե՞ս ամաչում, ամոթ ա, զոհված զինվորի մոր հետ ո՞նց եք վարվում, քո մոր տարիքի կին ա, մենակ իրա դարդը հերիք ա»:
Ինչից հետո, ըստ տիկին Իրինայի, մյուս ոստիկանը, «վերցրեք ու թքեց արդեն ինձ վրա՝ առանց ամաչելու»։
Այժմ սևազգեստ մայրերը շարժվում են դեպի ՀՀ ոստիկանության կենտրոնական շենք՝ այնտեղ բողոքի ակցիա անելու։










