Կոտայքում ՀՀԿ նախընտրական շտաբը ես չեմ համակարգելու, ոչ էլ ընդգրկվելու եմ «Ծառուկյան դաշինքում». Կարապետ Գուլոյան
Կոտայքի մարզպետ Կարապետ Գուլոյանը, ով «Բարգավաճ Հայաստան» կուսակցության հիմնադիր Գագիկ Ծառուկյանի փեսան է, չի համակարգելու Հայաստանի Հանրապետական կուսակցության Կոտայքի նախընտրական շտաբը, ոչ էլ ընդգրկվելու է «Ծառուկյան դաշինքում»:
Այս մասին Tert.am-ին հայտնեց հենց Կարապետ Գուլոյանը՝ հիշեցնելով, որ ՀՀԿ Կոտայքի մարզի տարածքային կազմակերպության ղեկավարը Կոտայքի նախկին մարզպետ Արամ Հարությունյանն է:
Հիշեցնենք, որ «Հայկական ժամանակ» օրաթերթն այսօր տեղեկություն էր տպագրել, ըստ որի` ՀՀԿ-ում նախնական որոշում կա, որ Կոտայքի մարզում ՀՀԿ նախընտրական շտաբի համակարգողը լինելու է նախկին ԲՀԿ-ական, ներկայումս անկուսակցական Կոտայքի մարզպետ Կարապետ Գուլոյանը:
Հարցից, թե այդ դեպքում ինչպես է բացատրում այն, որ ՀՀԿ կազմակերպչական հարցերով հանձնաժողովի նախագահ Ռուբեն Թադևոսյանը «Հայկական ժամանակ»-ի հետ զրույցում չի բացառել նման հավանականությունը, ծանո՞թ է հրապարակմանը, Կարապետ Գուլոյանն անկեղծորեն զարմացավ ու ասաց. «Չէ, տեղյակ չեմ, ճիշտն ասած»:
Ինչ վերաբերում է ճշգրտող հարցին, թե միգուցե ՀՀԿ-ի հետ այս առումով ինչ-որ բանակցություննե՞ր է վարել, պայմանավորվածություննե՞ր ունի, նա պատասխանեց. «Ոչ, նման խոսակցություն չի եղել»:
Tert.am-ը զրուցեց նաև ՀՀԿ կազմակերպչական հանձնաժողովի նախագահ Ռուբեն Թադևոսյանի հետ, ով նշեց. «Ես նման բան չեմ ասել, ես ասել եմ` Գործադիր մարմնի նիստից հետո, երբ կորոշվեն պատասխանատուները. հարց է եղել՝ կարո՞ղ է արդյոք լինել (Գուլոյանը), ասել եմ՝ քաղաքականության մեջ ամեն ինչ էլ հնարավոր է: Կարող է՝ Դուք էլ լինեք, ի՞նչ է եղել որ»:
Հարցին էլ, թե ՀՀԿ շտաբի պետը կարո՞ղ է լինել ոչ ՀՀԿ-ական, Ռուբեն Թադևոսյանը դրական պատասխան տվեց։ Ամեն դեպքում, նա հստակեցրեց, որ այս պահին որոշված չեն շտաբերի պատասխանատուները:
Ըստ ՀՀԿ կազմակերպչական հանձնաժողովի նախագահի` ԳՄ նիստը այսօրվանից տեղափոխվել է շաբաթ օրը։
Մեկ այլ հրապարակման վերաբերյալ, ըստ որի՝ առաջադրվելու տրամադրություններ ունի նաև «Արաբկիրի» նախկին թաղապետ Ալբերտ Երիցյանը, Ռուբեն Թադևոսյանը նշեց, որ վերջինս եղել և առ այսօր Հայաստանի Հանրապետական կուսակցության անդամ է:










