ZDF-ն հայտնել է Չեչնիայից փախստականների անվան տակ Կրեմլի գործակալների՝ Եվրոպա ուղարկման մասին

14:10 • 10.02.17

Ռուսաստանից փախստականների անվան տակ կեղծ փաստաթղթերով Չեչնիայի բնակիչներ են ուղարկվել Եվրոպա, որոնք այժմ օտար երկրներում ռուսական գործակալական ցանցի մաս են: Այդ մասին հաղորդվում է գերմանական ZDF հեռուստաալիքի «Պուտինի սառը պատերազմը» վավերագրական ֆիլմում, որը եթեր է դուրս եկել չորեքշաբթի երեկոյան, հայտնում է Deutsche Welle-ի ռուսական ծառայությունը:


Փախստականների անվան տակ գործակալների ուղարկման մասին հեռուստաալիքին պատմել է ՌԴ անվտանգության դաշնային ծառայության նախկին բարձրաստիճան պաշտոնյան, որը ֆիլմում ներկայացված է որպես Իգոր: Նա պատմում է, որ Ռուսաստանը գործակալներին ուղարկում է, որպեսզի նրանք ինտեգրվեն Գերմանիայի, Ֆրանսիայի և Մեծ Բրիտանիայի մահմեդական համայնքներին և կարողանան «ազդել քաղաքական իրավիճակի վրա՝ Կրեմլի շահերի համաձայն»: Իգորի խոսքով՝ այդ գործակալները «հետևում են ռեժիմի քննադատներին և ծայրահեղական իսլամիստներին»:


«Արդյունքների մասին զեկուցվել է նախագահին, և նա հավանության է արժանացրել դրանք»,- ասել է Իգորը: Նա նաև պատմել է, որ անձամբ է մասնակցել կեղծ փաստաթղթերի պատրաստմանը, որպեսզի Չեչնիայի բնակիչները կարողանան Եվրոպա մեկնել և այնտեղ քաղաքական ապաստան խնդրել:


Ֆիլմի հեղինակն ընդգծում է, որ տեսել է Իգորի ծառայողական վկայականը և ապացույցներ ունի, որ նա իսկապես աշխատել է հատուկ ծառայությունում: Ֆիլմում Իգորի դեմքը փակ է, նրա ձայնը՝ փոխված: Ռուսաստանից հեռանալու մասին որոշումն Իգորը բացատրում է նրանով, որ չէր ցանկանում զբաղվել այդ թվում ընդդիմադիրների դեմ գործեր կեղծելով: