Մա՛հ Ամերիկային. հարյուր հազարավոր իրանցիներ մասնակցել են Թրամփի դեմ բողոքի ակցիային
Իրանի հարյուր հազարավոր բնակիչներ 1979թ. տեղի ունեցած իսլամական հեղափոխության տարեդարձի կապակցությամբ բողոքի ակցիա են կազմակերպել Միացյալ Նահանգների նախագահ Դոնալդ Թրամփի դեմ, հայտնում է Reuters-ը՝ Իրանի պետական հեռուստատեսությանը հղումով:
Աղբյուրը նկատում է, որ լայնազանգված բողոքի ակցիային նախորդել էր Սպիտակ տան պաշտոնական հայտարարությունն առ այն, որ Թրամփն «աչքի տակ» է առել Իրանը:
Նշվում է, որ ցուցարարները բղավել են «Մա՛հ Ամերիկային», կրել են «Շնորհակալ ենք Թրամփին ԱՄՆ իսկական դեմքը ցույց տալու համար» գրությամբ պաստառներ, ինչպես նաև Թրամփին նմանակող ծաղրական արձաններ. այդ ամենն ուղեկցվել է ազգային հեղափոխական երգերով:
Պետական հեռուստատեսությամբ ցուցադրվել են կադրեր, թե ինչպես են մայրաքաղաք Թեհրանում ցուցարարները տրորում Թրամփի նկարները:
Հայտնի է, որ ցույցի ժամանակ ելույթ է ունեցել Իրանի նախագահ Հասան Ռոհանին:
«Որոշ անփորձ մարդիկ ու Ամերիկան սպառնում են Իրանին: Բայց նրանք պետք է իմանան, որ սպառնալիքների լեզուն չի ազդում Իրանի վրա: Մենք այնպես կանենք, որ Իրանին սպառնացողները զղջան: Նրանք պետք է սովորեն հարգել Իրանն ու իրանցիներին: Մենք ուժեղ հակահարված կտանք ռազմատենչ քաղաքականությանը»,-հավաքվածներին ասել է Ռոհանին:
Հիշեցնենք, որ ավելի վաղ Թրամփն Իրանն անվանել էր «թիվ 1 ահաբեկչական պետություն»՝ սպառնալով չեղարկել ավելի վաղ այդ երկրի հետ կնքված միջուկային համաձայնագիրը:










