Կհանդիպենք դատարանում. Թրամփը մեկնաբանել է իր հրամանագրի դեմ կայացված վճիռը
Միացյալ Նահանգների վերաքննիչ դատարանն օրինական է ճանաչել նախագահ Դոնալդ Թրամփի միգրացիոն հրամանագրի կասեցումը, հայտնում է Reuters-ը:
Քսան էջանոց դատավճռում նշվում է, որ հունվարի 25-ին ստորագրված և առավելապես մահմեդական բնակչությամբ 7 երկրի քաղաքացիների մուտքն ԱՄՆ 90 օրով արգելող հրամանագիրը չի բխում Միացյալ Նահանգների շահերից:
Դատարանը նկատել է, որ Թրամփի վարչակազմը չի ներկայացրել այնպիսի համոզիչ ապացույցներ, որոնց հիման վրա հնարավոր կլիներ չեղարկել միգրացիոն հրամանագիրը:
Հայտնի է, որ Թրամփն արդեն արձագանքել է Վերաքննիչ դատարանի վճռին՝ համապատասխան գրառում անելով իր թվիթերյան միկրոբլոգում:
«Կհանդիպենք դատարանում. խաղասեղանին դրված է ազգային անվտանգությունը»,-գրել է 70-ամյա հանրապետականը, որը լրագրողների հետ հանդիպման ժամանակ ասել է, որ իր թիմն անպայման հաղթելու է այս գործը:
Հիշեցնենք, որ ավելի վաղ ԱՄՆ արդարադատության նախարարությունը բողոքարկել էր Սիեթլի դատարանի վճիռը, որը ժամանակավորապես կասեցրել էր միգրացիոն քաղաքականության խստացման վերաբերյալ հրամանագրի իրականացումը:










