27-ամյա բրիտանուհին միացել է Սիրիայում ԻՊ-ի դեմ պայքարող քրդական ուժերին (լուսանկար)
Բրիտանական Բելքբրն քաղաքի բնակչուհին առաջին բրիտանուհին է, որը միացել է Սիրիայում «Իսլամական պետություն» ահաբեկչական խմբավորման դեմ մարտնչող քրդական ուժերին:
Ինչպես ներկայացնում է The Independent-ը, 27-ամյա Քիմբերլի Թեյլորը ներկայում կռվում է Կանանց պաշտպանության միավորման (YPJ) շարքերում հյուսիսային Սիրիայում, որտեղ քրդական ուժերը`միջազգային կոալիցիայի ավիահարվածների աջակցությամբ փորձում են դուրս մղել գրոհայիններին նրանց գլխավոր հենակետը հանդիսացող Ռաքքայից և արվարձաններից:
Բրիտանուհին առավել հայտնի է Զիլան Դիլմար քրդական անունով: Նա հիմնականում աշխատում է միավորման մամուլի թիմում` գրանցելով և հաղորդելով նրանց իրականացրած գործողությունները, սակայն մասնակցում է նաև մարտական գործողությունների:











