Լեռնանիստ գյուղում մթերային խանութի փլուզման հետևանքով փլատակների տակ մնացած 2 կին է զոհվել. վիրավորները տեղափոխվում են Երևան

10:58 • 14.02.17

12.54

ՀՀ արտակարգ իրավիճակների նախարարությունը մանրամասներ է հայտնում Կոտայքի մարզի Լեռնանիստ գյուղում՝ մթերային խանութում տեղի ունեցած փլուզման վերաբերյալ։

ԱԻՆ տեղեկացմամբ՝ փլուզվել է Լեռնանիստ գյուղի 7-րդ թաղամասի թիվ 40 հասցեում գտնվող մթերային խանութի տանիքը, սակայն պատճառներն այս պահին դեռևս բացահայտված չեն:

Ժամը 12.03-ի դրությամբ ավտոկռունկի օգնությամբ փլատակներից դուրս է բերվել երկու կնոջ (մոտ 32 և 50 տարեկան) դի:


______________________________

12.36

«Հրազդան» բժշկական կենտրոնի տնօրեն Ռոբերտ Սահակյանը քիչ առաջ Tert.am-ին հայտնեց, որ Լեռնանիստ գյուղում մթերային խանութում տեղի ունեցած փլուզման հետևանքով երկու զոհերը կանայք են, ովքեր մնացել են պանելի տակ: «Նրանք մահացել են պանելի ընկնելու հետևանքով»,- ասաց նա:

Նա նշեց, որ բացի նշված 2 զոհից, իրենց մոտ տեղափոխել է նաև 2 վիրավոր։ Վիրավորներից մեկը ստացել է ազդրի, կոնքի, ողնաշարի կոտրվածք և նրան տեղափոխել են արդեն Երևան, մյուս տուժածը ևս ստացել է կոնքի կոտրվածք և նրան ևս տեղափոխելու են Երևան, վիճակը բավարար է:

_______________________________

Այսօր ժամը 10:20-ի սահմաններում ՀՀ ոստիկանության Հրազդանի բաժին ահազանգ է ստացվել, որ Լեռնանիստ գյուղի խանութը փլուզվել է, կան տուժածներ: Ոստիկանության լրատվության ԶԼՄ-ների հետ կապերի բաժնից Tert.am-ին հայտնեցին, որ դեպքի վայրում տարվում են համապատասխան աշխատանքներ:

Նշենք, որ ժամը 10:15-ին ՀՀ արտակարգ իրավիճակների նախարարություն ահազանգ է ստացվել, որ Կոտայքի մարզի Լեռնանիստ գյուղում՝ մթերային խանութում, տեղի է ունեցել պայթյուն: Ըստ նախնական տվյալների՝ կա երկու զոհ և երկու տուժած:

Լեռնանիստի գյուղապետ Արտյոմ Հայրապետյանը Tert.am-ի հետ զրույցում ասաց, որ այս պահին ինքը դեպքի վայրում է, սակայն մանրամասներ չկարողացավ հաղորդել: Նա նշեց, որ լուրջ դեպք է, 4-5 տուժած կա, երկուսը հիվանդանոցում են:

Նշենք, որ ինչպես հայտնում են ԱԻՆ լրատվական ծառայությունից, դեպքի վայր են մեկնել մեկ մարտական հաշվարկ, հատուկ նշանակության փրկարարական աշխատանքներ իրականացնող կենտրոնի փրկարարական ջոկատը, ՃԿԱԿ արտակարգ իրավիճակների արձագանքման և օպերատիվ խմբերը և հոգեբանական խորհրդատվական գծով հրահանգիչը:

 

Ըստ Shamshyan.com-ի տեղեկությունների՝ մթերային խանութի շենքի տանիքում մնացած ձյան պատճառով խոշոր փլուզում է տեղի ունեցել, ինչի հետևանքով էլ՝ դարձյալ, ըստ նախնական տեղեկությունների, փլատակների տակ քաղաքացիներ կան։

Կայքի տեղեկություններով՝ քաղաքացիները, փրկարարները, ոստիկանների և բժիշկների հետ համատեղ աշխատանքներ են կատարում՝ պարզելու՝ փլատակների տակ քաղաքացիներ կա՞ն, թե՞ ոչ, իսկ դեպքի վայրում հավաքվածներն ասել են, որ աշխատակիցներ հաստատ կան այնտեղ։