Նա հրաշալի է. Ջուլիան Ասանժն առաջին անգամ մեկնաբանել է Պամելա Անդերսոնի հետ սիրավեպ ունենալու լուրերը
Սկանդալային նյութերի հրապարակմամբ զբաղվող WikiLeaks կայքի հիմնադիր Ջուլիան Ասանժն առաջին անգամ մեկնաբանել է 1990-ականների սեքս-խորհրդանիշ Պամելա Անդերսոնի հետ սիրավեպ ունենալու վերաբերյալ ակտիվորեն շրջանառվող լուրերը:
Ինչպես նշում է The Daily Mail-ը, ավստրալական ռադիոընկերություններից մեկին տված հարցազրույցում Ասանժը նշել է, որ Playboy ամսագրի նախկին աստղը «գրավիչ, հրաշալի և ազդեցիկ անձ է»:
«Նա գրավիչ կին է և, միևնույն ժամանակ, խելացի: Նա ամենևին էլ հիմար չէ և նույնիսկ խորամանկ է»,-մանրամասնել է Ասանժը՝ ընդունելով, որ իր և Անդերսոնի մտերմությունը նպաստում է միջազգային հանրության ուշադրությունն իր խնդրի վրա սևեռելուն:
Այնուհանդերձ՝ Ասանժը խուսափել է ուղիղ պատասխան տալ լրագրողի հարցին, թե արդյոք ինքը սիրահարված է կրքոտ շիկահերին:
«Ես նրան հավանում եմ, նա հրաշալի է, իսկ մանրամասների մասին խոսելուց կխուսափեմ: Իրականում անցած մի քանի տարվա ընթացքում նա ինձ օգնելու համար շատ ավելի բան է արել, քան Ավստրալիայի բոլոր վարչապետները միասին»,-շարունակել է Ասանժը, որը ծագումով ավստրալացի է:
Հիշեցնենք, որ անցած 4 ամսվա ընթացքում Անդերսոնը 5 անգամ այցելել է 2012թ. ի վեր Լոնդոնում Էկվադորի դեսպանատանն ապաստանած Ասանժին:
Անդերսոնը սկսել է այցելել 44-ամյա Ասանժին 2014թ. սեպտեմբերից: Նրա վերջին այցն Էկվադորի դեսպանատուն տեղի է ունեցել հունվարի վերջին:
Ասանժը 2012թ. հունիսից ապրում է Էկվադորի դեսպանատանը՝ խուսափելով Շվեդիա արտահանձնումից, որտեղ նրան մեղադրում են բռնաբարության համար: Ասանժը մտավախություն ունի, որ Շվեդիայի իշխանություններն իրեն կարող են արտահանձնել Միացյալ Նահանգներին, որտեղ նրան ցմահ ազատազրկում է սպառնում:










