ԼՂՀ բնակչության գերակայող մասը կողմ է Սահմանադրության հանրաքվեին, և դրա հիմնական գրավականը գործող նախագահի իմիջն է. Ա. Ադիբեկյան
Արցախում նախագահական համակարգին անցնելը դրական է գնահատել հարցված բնակչության 48 %-ը՝ կարևորելով ռազմական դրության հետ կապված օպերատիվ կառավարման հզորացման անհրաժեշտությունը:
Այսօր լրագրողների հետ հանդիպմանն այս մասին հայտնեց սոցիոլոգ Ահարոն Ադիբեկյանը:
Նշենք, որ փետրվարի 20-ին ԼՂՀ-ում Սահմանադրության հանրաքվե է անցկացվելու: «Սոցիոմետր» սոցիոլոգիական կենտրոնն այդ առիթով Արցախում հարցում է անցկացրել 1000 ընտրողների և քաղաքական ուժեր ու հասարակական կազմակերպություններ ներկայացնող 30 փորձագետների շրջանում:
Ըստ հարցման՝ ակտիվ ընտրողների 80 %-ը տեղյակ է գործընթացներից, և նրանցից 70 %-ը պատկերացնում ունի հանրաքվեից ակնկալվող նորամուծությունների մասին:
«Նախագահական համակարգին անցնելը դրական է գնահատել 48 %-ը՝ կարևորելով ռազմական դրության հետ կապված օպերատիվ կառավարման հզորացման անհրաժեշտությունը, իսկ 7 %-ը բացասական՝ մեկ ձեռքին իշխանությունը լրիվ տրամադրելու հնարավոր ռիսկերի համար»,- ասաց սոցիոլոգը:
Ըստ նրա՝ Արցախի ընդդիմության մի մասը կողմ է նոր Սահմանադրությանը, բայց մեծ մասը՝ դեմ: Նա նշեց նաև, որ իշխանության որոշ մասն էլ է կասկածամտորեն վերաբերվում հանրաքվեին, քանի որ ցանկացած փոփոխություն կարող է հարվածել իրենց պաշտոնին:
Ադիբեկյանի համոզմամբ՝ Արցախի հանրապետության նախագահական համակարգին անցնելուն կողմ կքվեարկի բնակչության մոտ 80 տոկոսը. «Գերակայող մասը կողմ է, և դրա հիմանական գրավականներից մեկը գործող նախագահի իմիջն է: Նա վստահություն է ներշնչում ժողովրդին և ունի այն բոլոր հատկությունները, որ պետք է նախագահական հանրապետության նախագահին»,- նշեց նա։
Հարցվածների 83 տոկոսը ճիշտ է համարում ԼՂՀ-ի անվանափոխումը Արցախի հանրապետության, իսկ 11 տոկոսը՝ սխալ:
«Հիմնականում երիտասարդներն են դեմ Ղարաբաղ անվանը: Նրանք ցանկանում են կտրվել թուրքական անվանումից, իսկ անվանափոխությունը սխալ համարող 11 տոկոսը դեմ է, քանի որ իրենց ճանաչում են Ղարաբաղ անվանմամբ»,- հայտնեց Ադիբեկյանը:
Հիշեցնենք, որ ԼՂՀ վարչապետի մամուլի քարտուղար Արտակ Բեգլարյանը Sputnik Արմենիայի հետ զրույցում նշել էր, որ ԼՂՀ Սահմանադրության նախագծի ընդունման դեպքում «Ղարաբաղ» անունը ոչ թե փոխարինվելու է «Արցախ»-ով, այլ երկուսն էլ զուգահեռ կիրառվելու են, բայց առավելությունը տրվելու է «Արցախի Հանրապետություն» տարբերակին:










