Պետք է համոզել և ոչ թե բոլորին դեմ գնալ. ՀԿ-ները ԵԱՀԿ երևանյան գրասենյակի հնարավոր փակման հարցով կդիմեն ԵԱՀԿ քարտուղարություն

14:22 • 16.02.17

 

ՀՀ քաղաքացիական հասարակության ներկայացուցիչները Հայաստանում ԵԱՀԿ գրասենյակի հնարավոր փակման վերաբերյալ իրենց մտահոգությունն արտահայտող բաց նամակ են պատրաստվում ուղղել  ԵԱՀԿ գլխավոր քարտուղարություն և կոչ են անում իրենց միանալ նաև այլ կազմակերպությունների։

Մեդիա կենտրոնում այսօր հրավիրված ասուլիսին ընթացքում նախաձեռնության հեղինակներից «Գլոբալիզացիայի և տարածաշրջանային համագործակցության վերլուծական կենտրոնի» նախագահ Ստեփան Գրիգորյանը նշեց, որ իրենք հույս ունեն, որ ԵԱՀԿ անդամ երկրները ժողովրդավար լինելով՝ հասկանում են, թե ինչ է նշանակում ժողովրդավարությունը:

«Հիմա հասարակությունը դիմում է նրանց՝ ԵԱՀԿ անդամ երկրներին, աջակցել մեր երկրի ժողովրդավարացմանը և այս նախաձեռնությունն էլ դրական արդյունք կտա և կհասկանան, որ այնպես չէ, որ գրասենյակն աշխատում է, իսկ հասարակությունը՝ պասիվ է: Այսինքն՝ կհասկանան, որ մենք գնահատում ենք դրական աշխատանքը, սա նրանց համար լուրջ ազդակ է»,- ասաց նա:

Ստեփան Գրիգորյանի խոսքով՝ պաշտոնական Երևանի գիծը պետք է լինի այն, կարողանա համոզել ուժեղ երկրներին, որոնք մեծ լումա ունեն ԵԱՀԿ կազմման և ֆինանսավորման հարցում, այդ երկրների հետ աշխատել ու համոզել: Բոլորի դեմ դուրս գալը օգուտ չի կարող լինել»,- ասաց նա:

Ստեփան Գրիգորյանի խոսքով՝ պետք է նաև հասկացնել, որ ԵԱՀԿ երևանյան գրասենյակը ոչ մի կապ չունի կոնֆիլկտների լուծման հարցում և նրա խնդիրն է ժողովրդավարության հասնելը: «Ու այդ ճանապարհով աշխատելով գլխավոր երկրների հետ, այդ թվում նաև Մեծ Բրիտանիայի՝ կարող են և փորձել ազդել Ադրբեջանի դիրքորոշման վրա:

Վանաձորի ՀՔԱ գրասենյակի ղեկավար Արթուր Սաքունցի խոսքով՝ նման գործելակերպը դեմ է հենց Եվրոպայի անվտանագության և համագործակցության սկզբունքներին: «Եթե Ադբերջանի իշխանությունները գտնում են, որ Ադրբեջանը ժողովրդավար է և այնտեղ պետք է փակվի գրասենյակը, ապա դա չի նշանակում, որ նա կարող է մեկ այլ երկրի զրկի, որը գտնում է, որ գրասենյակի կարիքը կա, և, փառք Աստծո, որ մեր իշխանությունները գտնում են որ կարիքը կա»,- ասաց նա:

Արթուր Սաքունցը, սակայն, լավատես է. «Ես լավատեսորեն եմ տրամադրված և, իմ  տեղեկությամբ, լուրջ աշխատանք է տարվում, և Ադրբեջանը չի կարող այդ երկրների հորդորներին դիմակայել»:  

Հարցին, թե խորհրդարանական ընտրությունների նախաշեմին, երբ փակվի ԵԱՀԿ երևանյան գրասենյակը, ի՞նչ կլինի, Հայաստանի Հելսինկյան կոմիտեի նախագահ Ավետիք Իշխանյանը պատասխանեց, որ կարևոր է, որ ընտրություններին գրասենյակը լինի, որը կոորդինացնում է ԵԱՀԿ աշխատանքը: «Բայց դա չի նշանակում, որ եթե գրասենյակը փակվի՝ ԺՄԻԳ-ի դիտորդները չեն գա: Իհարկե, վերահսկողությունը կտուժի, որովհետև ԵԱՀԿ-ի ականջն է այստեղ և շատ լավ հետևում է գործընթացներին»,-ասաց նա: