Ռուսաստանն ամեն ինչ չի թողնի և զբաղվի ԼՂ հիմնախնդրով, եթե կողմերը պատրաստ չեն համաձայնության գալ. ռուս քաղաքագետ

15:43 • 16.02.17

Լեռնային Ղարաբաղի հիմնախնդիրը ստվերում մնաց ուկրաինական և սիրիական հիմնախնդիրների պատճառով. լրագրողների հետ զրույցում այսպես ասաց Ռուսաստանի հումանիտար գիտությունների ինստիտուտի պրոֆեսոր, քաղաքագետ Սերգեյ Մարկեդոնովը:

Նա նկատեց, որ Լեռնային Ղարաբաղի հիմնախնդրում Ռուսաստանը Արևմուտքի հետ հակասությունների մեջ չէ, դեռ ավելին՝ վերջինս ավելի շահագրգռված է, որ Ռուսաստանն ակտիվացնի իր միջնորդական առաքելությունը հիմնախնդրի կարգավորման գործընթացում:

Սերգեյ Մարկեդոնովը տարակուսեց, թե ինչու են Ռուսաստանի միջնորդական առաքելությանը թերահավատորեն վերաբերում, ասում, թե խնդրին վերջնական լուծում չի տրվում: Նա մատնանշեց, որ ԼՂ հիմնախնդրում նախկինում այլ երկրների կողմից հանդես եկած այլ միջնորդական առաքելությունները ևս անհաջողության են մատնվել:

Մարկեդոնովի խոսքով՝ պետք է հասկանալ՝ Ռուսաստանի համար Լեռնային Ղարաբաղի հիմնախնդիրը կարևոր է, բայց ամենակարևոր հիմնախնդիրներից չէ:

«Նա պատրաստ չէ ամեն ինչ թողնել ու զբաղվել Լեռնային Ղարաբաղի հիմնախնդրով, եթե կողմերը պատրաստ չեն համաձայնության գալ»,- ասաց նա:

Նրա խոսքով՝ և՛ Բաքուն, և՛ Երևանը կցանկանային, որ Մոսկվան վերջնական ընտրություն կատարեր: «Բայց դա չի լինի: Չարժե Ադրբեջանին բացահայտ թշնամու վերածել․ դա ձեռնտու չէ առաջին հերթին Հայաստանին»,- ասաց նա՝ հավելելով, որ այդպես Ադրբեջանն առավել կագրեսիվանա:

«Ռուսաստանը կարող է ընտրություն կատարել և կկատարի: Սակայն հարկ է հիշել, որ դա վտանգների հետ է կապված, իսկ ջանքերը կկենտրոնանան խնդիրը խաղաղ ճանապարհով լուծելու փորձերի վրա»,- ասաց Մարկեդոնովը:

Նա նաև նշեց, որ սահմանում լարվածության աճը հնարավոր է, պատերազմ հնարավոր է, որովհետև Ադրբեջանը դժգոհ է իրավիճակից:

«Ստատուս քվոն հիմա առավել շատ շահեկան է Հայաստանի համար, քան Ադրբեջանի համար»,- ասաց նա՝ հավելելով, որ Մոսկվայի համար առավել կարևոր է, որ իրավիճակը վերահսկվի և լարվածություն չլինի: