Թուրքիայի հարավ-արևելքում պայթյուն է որոտացել. կա 2 զոհ և 18 վիրավոր (տեսանյութ)

09:31 • 18.02.17

Թուրքիայի Շանլըուրֆա նահանգի Վիրանշեհիր շրջանում պայթյուն է որոտացել, ինչի հետևանքով կա 2 զոհ և 18 վիրավոր: Այս մասին գրում է «Միլլիյեթ»-ը` հղում անելով նահանգապետին:

Նահանգապետի խոսքով` դատարանների և դատախազությունների աշխատակիցների և նրանց ընտանիքների համար նախատեսված բնակելի համալիրի մոտակայքում պայթել է ավտոմեքենա, որում ռումբ է տեղադրված եղել:

Հայտնի է, որ պայթյունի հետևանքով մահացել է 2 մարդ` երեք տարեկան երեխա և տղամարդ, ևս 18 մարդ վնասվածքներ են ստացել:

Միջադեպի ականատեսներից մեկը պատմել է, որ պայթյունի ալիքը ցնցել է մոտակայքում գտնվող շինություններն ու զգացվել ամբողջ թաղամասում:

Թուրքիայի արդարադատության նախարար Բեքիր Բոզդագը տեղի ունեցածն ահաբեկչական ակտ է անվանել թվիթերյան գրառման մեջ` նշելով, որ հարձակման թիրախ են եղել դատավորները, դատախազներն ու պաշտոնյաները:

 

Տեսանյութը կարող եք դիտել այստեղ։