Ադրբեջանի սպառնալիքներն ինձ հետ չեն պահի Արցախ այցելելուց. միջազգային դիտորդ

10:46 • 21.02.17

Արցախի հանրապետությունում անցկացված հանրաքվեում խնդրահարույց բան չկար, և այն մեծապես համապատասխանում էր Արևմտյան Եվրոպայի չափանիշներին: Այսօր՝ փետրվարի 21-ին կայացած մամուլի ասուլիսին այս մասին ասաց Եվրախորհրդարանում Արցախի բարեկամության խմբի ղեկավար, հանրաքվեի միջազգային դիտորդ Ֆրանկ Էնգելը:

Էնգելը հայտնեց, որ դիտորդական առաքելության ժամանակ այցելել է Ասկերանի, Մարտունու, Ստեփանակերտի ընտրատեղամասեր, և ըստ նրա՝ նոր սահմանադրության օրինականությունը կարելի է համարել կայացած:

Եվրոպացի դիտորդը զարմացած նշեց, որ մասնակցությունը բավական զգալի էր, ինչը բնորոշ չէ Կովկասի պետություններին։

«Արցախցիները բավական լուրջ էին մոտենում հանրաքվեին: Արցախի ժողովուրդը ասել է այո, բավական հիմնավոր: Թվերը խոսում են այն մասին, թե ինչ է առաջարկվել և ինչ են մարդիկ ուզում»,- ասաց նա:

Հարցին, թե Ադրբեջանի արտաքին գործերի նախարարության ներկայացուցիչը հայտարարել էր, որ Արցախ այցելած միջազգային դիտորդները կհայտնվեն Ադրբեջանի սև ցուցակում, արդյո՞ք դա չի մտահոգում իրեն, Էնգելը պատասխանեց. «Իմ հաջորդ արձակուրդները չեմ պլանավորել Ադրբեջանում անցկացնել: Եթե հայտնվեմ, այնպես չէ, որ կզարմանամ, և դա ինձ հետ չի պահի Արցախ այցելելուց»:

Ինչ վերաբերում է նրան, թե հանրաքվեն ինչպես կանդրադառնա արցախյան հիմնախնդրի կարգավորման վրա, Ֆրանկ Էնգելը պատասխանեց, որ դրանք անմիջական կապ չունեն իրար հետ: