Էստոնիայի հետախուզությունը նախազգուշացրել է ՆԱՏՕ-ի զինվորներին Ռուսաստանի հնարավոր սադրանքների մասին

13:41 • 21.02.17

Էստոնիայի արտաքին հետախուզության ղեկավար Միկ Մարանը հայտարարել է, որ Ռուսաստանը կարող է սադրանքներ նախապատրաստել ՆԱՏՕ-ի զինվորների համար, որոնք տեղակայվելու են Արևելյան Եվրոպայի երկրների տարածքում՝ դաշինքի ուժերի ռոտացիայի վերաբերյալ համաձայնագրի շրջանակում: Նա Ռուսաստանի կողմից հնարավոր սադրանքների մասին նախազգուշացրել է բրիտանացի զինվորներին, որոնք առաջիկա շաբաթներին ծառայության են անցնելու Էստոնիայի տարածքում ՆԱՏՕ-ի գումարտակների կազմում, գրում է The Times-ը:


Մարանի խոսքով՝ այդ սադրանքի նպատակը լինելու է դաշինքի արևելյան սահմանի ամրացման ուղղությամբ ՆԱՏՕ-ի ծրագրերի վարկաբեկումը, իսկ մեթոդների թվում, որոնք օգտագործվելու են ՆԱՏՕ-ի զինվորների դեմ, լինելու են «մեղր թակարդները» (երբ հետախուզական ծառայությունները գրավիչ կին են ուղարկում անդամագրման կամ հատուկ ծառայությունների շահերից սադրանք կազմակերպելու համար) և հետագա շանտաժի համար սոցիալական ցանցերում կոմպրոմատի որոնումը:


«Զինծառայողներն իրենց զորամասերից գնալու են քաղաքներ: Հնարավոր է՝ նրանք գնան փաբեր: Մենք չենք կարող բացառել, որ այդ պայմաններում վեճեր կհրահրվեն: Օրինակ՝ ավանդական «մեղր թակարդներ» և այլն»,- ասել է Միկ Մարանը:


Նրա խոսքով՝ բրիտանացի և էստոնացի զինվորականներն «ամիսներ շարունակ» քննարկել են հնարավոր սպառնալիքները և 800 բրիտանացի զինվորի պատրաստել Էստոնիայի տարածքում տեղակայվելու համար՝ «սառը պատերազմի ոճով լրտեսական խաղերից խուսափելու» նպատակով: