ՀՀԿ-ն ընտրություններին կմասնակցի «Անվտանգություն և առաջընթաց» նշանաբանով. Շարմազանով

22:20 • 23.02.17

Հայաստանի Հանրապետական կուսակցության նախընտրական քարոզչությունը կմեկնարկի «Անվտանգություն և առաջընթաց» նշանաբանով: ՀՀԿ Գործադիր մարմնի նիստից հետո այս մասին հայտարարեց ՀՀԿ խոսնակ, ԱԺ փոխնախագահ Էդուարդ Շարմազանովը:

Նա լրագրողներին տեղեկացրեց, որ նիստի ընթացքում հիմնականում քննարկվել են ՀՀԿ-ի քարոզչական նախընտրական փաթեթի հետ կապված հարցեր: Շարմազանովի խոսքով՝ նաև քննարկվել և ընդունվել է ՀՀԿ-ի նախընտրական ծրագիրը, որը հանրությանը կներկայացվի մարտի 5-ին:

«Կուսակցությունը որոշել է շատ ակտիվ քարոզարշավ իրականացնել, կօգտվենք ընդունված բոլոր միջոցներից: Քարոզչության հիմքը պետք է լինի ՀՀ անվտանգության ամրապնդումը, ինչպես նաև տնտեսական առաջընթացի ապահովումը, մարդու իրավունքների պաշտպանությունը, ժողովրդավարության զարգացումը»,- ասաց նա:

Ինչ վերաբերում է ՀՀԿ-ի ռեյտինգային ցուցակով առաջադրված թեկնածուներին վարկանիշին՝ Շարմազանովը նշեց. «Բոլոր 13 ընտրատարածքներում Հանրապետական կուսակցության տարածքային թեկնածուները ամենամրցունակն են, ամենահայտնի են, և, կարծում եմ, ժողովրդականություն վայելողը: Դա ցույց կտան ապրիլի 2-ի ընտրությունները»:

ՀՀԿ խոսնակը նաև անդրադարձել է ընտրակաշառքների մասին մամուլում շրջանառվող լուրերին. «Ընտրակաշառք երևույթին և առհասարակ բոլոր հակաօրինական երևույթներին ոչ միայն ես, այլ նաև մեր թիմը շատ բացասաբար է վերաբերում: Մենք ունենք շատ հստակ հանձնարարական՝ բացառապես օրենքի սահմաններում քարոզարշավ իրականացնել: Լրատվամիջոցները շատ բան են գրում, բայց ես քաղաքացու բողոք դեռ չեմ լսել»,- ասաց Շարմազանովը՝ հավելելով, որ ընտրություններից 2 ամիս առաջ կաշառք բաժանելու մասին լուրերը սենսացիա են։