Իրաքցի զինվորականներն ամբողջությամբ ազատագրել են Մոսուլի օդանավակայանը. լրատվամիջոցներ

15:24 • 23.02.17

Իրաքի դաշնային ոստիկանության արագ արձագանքման ջոկատն ամբողջությամբ ազատագրել է Մոսուլի օդանավակայանը: Այդ մասին «ՌԻԱ Նովոստի»-ին հայտնել է երկրի անվտանգության ուժերում աղբյուրը:


Իր հերթին՝ տեղական Shafaq News գործակալությունը, վկայակոչելով Իրաքի դաշնային ոստիկանության հրամանատար Ռաիդ Շաքեր Ջաուդատային, հայտնում է, որ կառավարական զորքերը հսկողության տակ են վերցրել օդանավակայանի տարածքի միայն մի մասը: Հաղորդվում է նաև, որ արագ արձագանքման ջոկատը հասել է թռիչքուղուն և ականազերծել ինքնաշեն պայթուցիկ սարքերը և պայթուցիկով լի մեքենաները, որոնք տեղադրված են եղել կառավարական զորքերի ճանապարհին:


Ավելի վաղ հաղորդվել է, որ Իրաքի անվտանգության ուժերը լայնամասշտաբ գրոհ են սկսել Մոսուլի օդանավակայանի և Մոսուլի հարավ-արևմուտքում գտնվող Ալ-Գազլանի ճամբարի ուղղությամբ:


Մեկ շաբաթ առաջ Իրաքի վարչապետ Հայդեր ալ-Աբադին հայտարարել է ԻՊ-ի գրոհայիններից Մոսուլի արևմտյան մասի ազատագրման գործողության մեկնարկի մասին:


ԻՊ խմբավորման ահաբեկիչներից արևելյան Մոսուլն ամբողջությամբ ազատագրվել է 2016 թվականի հոկտեմբերից ընթացող իրաքցի զինվորականների և ԱՄՆ-ի գլխավորությամբ գործող կոալիցիայի գործողության ընթացքում: Քաղաքի արևմտյան հատվածը դեռ մնում է գրոհայինների հսկողության տակ: