Հացադուլի մեջ գտնվող «հաց բերող» Արթուր Սարգսյանը հրաժարվում է որևէ տեսակի բժշկական օգնություն ստանալուց. Գոռ Ղլեչյան

19:44 • 27.02.17

ՀՀ ԱՆ «Դատապարտյալների հիվանդանոց» քրեակատարողական հիմնարկի կալանավորված անձ Արթուր Սարգսյանի առողջական վիճակի կապակցությամբ Քրեակատարողական ծառայությունը տեղեկացնում է, որ ինչպես նշվել է, փետրվարի 10-ից հացադուլի մեջ գտնվող Ա. Սարգսյանը հրաժարվում է որևէ տեսակի բժշկական օգնություն ստանալուց:

Ինչպես հայտնում  են ՀՀ ԱՆ ՔԿՎ հանրային կապերի բաժնից, Արթուր Սարգսյանը արյունային փսխումներ չի ունեցել, ձայնը լսելի է, խոսքը` հստակ է և ունի սթափ գիտակցություն:

Քրեակատարողական հիմնարկի համապատասխան մասնագետները ևս բազմիցս ներկայացրել են հացադուլի և բուժումից հրաժարվելու հետ կապված հնարավոր հետևանքների նկարագիրը, սակայն Ա. Սարգսյանն անդրդվելի է:

Հավելենք, որ Ա. Սարգսյանը գտնվում է «Դատապարտյալների հիվանդանոց» քրեակատարողական հիմնարկի բուժանձնակազմի շուրջօրյա դինամիկ հսկողության ներքո: