Ինձ խուզարկելը նաև իմ պաշտպանյալի իրավուքների ոտնահարում է, եթե ես չկարողացա դա կանխել, ես էլ ի՞նչ փաստաբան. Երվանդ Վարոսյան(տեսանյութ)

22:11 • 01.03.17

Վերջերս փաստաբանների մի խումբ հանդես եկավ հայտարարությամբ, որ քրեակատարողական հիմնարկներում ենթարկվում են խուզարկության, իսկ երբ հրաժարվում են խուզարկությունից, արգելվում է նրանց տեսակցել իրենց պաշտպանյալներին: Այս հարցի առնչությամբ հանդիպել էին նաև Արդարադատության նախարարն ու Փաստաբանների պալատի նախագահ Արա Զոհրաբյանը:

Փաստաբաններին խուզարկելու, ՔԿՀ վարչության հանրային կապերի բաժնի պարզաբանման, փաստաբանների անելիքի և այլ հարցերի շուրջ Tert.am-ը զրուցեց փաստաբան Երվանդ Վարոսյանի հետ:

-Պարո՛ն Վարոսյան, բոլորովին վերջերս փաստաբանների մի խումբ հայտարարում է, որ քրեակատարողական հիմնարկներում ենթարկվում է խուզարկության: Ինչպես տարանջատել զննությունն ու խուզարկությունը, և ինչո՞ւ է զննությունը վերածվում խուզարկության:

-Զննությունը թույլատրելի է և այն միշտ իրականացվել է նորմալ, ուղղակի պարբերաբար լինում են էտապներ, երբ զննությունը վերածվում է խուզարկության: Երբեք քրեակատարողական հիմնարկների աշխատակիցներն իրենց գործողությունները խուզարկություն չեն անվանում և չեն էլ անվանել նախկինում: Որն է դրանց տարբերությունը: Զննությունը, դա արտաքին զննություն է, ցանկացած միջամտություն արդեն վերածվում է խուզարկության: Ցանկացած գործողություն, որ բացի բուն դիտելուց միջամտություն է պարունակում, դա խուզարկություն է: Թե ինչո՞ւ է ժամանակ առ ժամանակ նման բան տեղի ունենում, չեմ կարող բացատրել, բայց կարծում եմ, որ  քրեակատարողական հիմնարկները ունեն բավականաչափ տեխնիկական սարքավորումներ, որպեսզի իրենց զննությունն անեն արդյունավետ՝ առանց դա խուզարկության վերածելու:

-Այս հարցով հանդիպեցին Արդարադատության նախարար Արփինե Հովհաննիսյանը և Փաստաբանների պալատի նախագահ Արա Զոհրաբյանը: Տարածվեց համատեղ հայտարարություն, որտեղ կետերից մեկը վերաբերում էր փաստաթղթերի բովանդակությանը: Ասվում է՝ ծանոթանալ փաստաթղթերին, չծանոթանալով բովանդակությանը: Ինչպե՞ս կարող է լինել դա և արդյո՞ք այդ հանդիպման պատասխանը բավարարել է Ձեզ:

-Անհասկանալի մնաց  այդ հանդիպման իմաստը,  քանի որ դրանից հետո բան չփոխվեց: Ինչ վերաբերում է հայտարարությանը, ինչպես ես առիթ ունեցա ասել, ավելի լավ է չլիներ:  Դա կարծում եմ «նոնսենս» է, երբ ՔԿՀ ծառայողները պետք է զննեն փաստաթղթերը, առանց բովանդակությանը ծանոթանալու: Մի քանի տարբերակներ կան՝ կամ աչքերը պիտի փակեն զննություն իրականացնելու ժամանակ, կամ պիտի չտիրապետեն հայերենին: Ես չգիտեմ, որ տարբերակն է ընտրվելու, բայց բոլոր տարբերակներն էլ անընդունելի են, որովհետև ինչ է նշանակում փաստաթուղթ զննել:

Կարծիքներ հնչեցին, որ խնդիրը արհեստական է բարձրաձայնվում, ի՞նչ են անում որ, մարդիկ թռուցիկ զննում են, ասում են պայուսակները բացեք, թռուցիկ նայում են, ու ասում են՝ անցեք: Եվ նաև Փաստաբանների պալատի պաշտոնյաներից մեկը, նրանք շատ են, չգիտեմ ով էր,  նման հայտարարություն արեց՝ հիմա ի՞նչ խնդիր է, որ բացում ենք ու թռուցիկ նայում են: Այսինքն, ձևակա՞ն են նայում, չեն ուզո՞ւմ նայել, ուղղակի սկզբունքային հա՞րց է, որ պայուսակը պիտի բացվի: Եթե այդպես է, ապա այդ ձևական բեմադրությանը ես մասնակցել բացառապես հրաժարվում եմ: Եթե սա անում են, որ ՔԿՀ-ներ արգելված իրեր չմտնեն, ապա դա պետք է այնպես անել, որ իրոք դա կանխվի:

-Ասացիք՝ երբեք թույլ չեք տա, որ ձեզ խուզարկեն: Ինչո՞ւ են փաստաբանները դեմ խուզարկելուն:

-Պաշտպանը, ով մուտք է գործում ՔԿՀ, իր հաճույքի համար չի գնում: Ինքը ստանձնել է կոնկրետ անձի իրավունքների պաշտպանությունը, որը պարտավոր է իրականացնել: Ինձ խուզարկելը դա առաջին հերթին իմ պաշտպանյալի իրավունքների ոտնահարում է: Եթե ես չկարողացա դա ապացուցել, ես ի՞նչ փաստաբան:

-Ի՞նչ անել այս  դեպքում, երբ Դուք ասացիք, որ Արդարադատության նախարարի և Փաստաբանների պալատի նախագահի հանդիպումն անարդյունավետ էր: Այդ դեպքում ի՞նչ է մնում անել նման իրավիճակից դուրս գալու համար:

-Ես կարծում եմ հեծանիվ հորինել պետք չէ, կան կարգեր, կա օրենք, որը թույլ չի տալիս խուզարկել, կա կառավարության որոշում, որը պարտադրում է իրականացնել զննություն: Նոր որևէ բան հորինել պետք չէ, պետք է իրականացնել այդ զննությունը: Կամ դա անել, ինչպես արվում էր նախկինում կամ, եթե ուզում են ավելի մանրակրկիտ զննություն իրականացնել, թող իրերը համապատասխան սարքերի միջոցով անցկացնեն և տեսնեն, որ արգելված իրեր չկան: Հատկապես, որ ՔԿՀ-ներում տեխնիկական հագեցվածությունը դա թույլ է տալիս:

-ՔԿՀ-ների հանրային կապի բաժինը հայտարարություն տարածեց, որ փաստաբաններին զննելուց հետո արգելվել է մի շարք արգելված իրերի տեղափոխությունը խուց: Այս առումով իրավական ընթացք տրվե՞լ է:

- «Նուբարաշեն» ՔԿՀ-ում մի օր առավոտյան տհաճ իրավիճակ էր, հերթեր էին, փաստաբաններին թույլ չէին տալիս խուզակել և այլն, ՔԿՀ-ի աշխատակիցներն էլ պատճառաբանեցին, որ արգելված իրեր են հայտնաբերվել և այլն: Հարցրեցի՝ ընթացք տրվել է, ասացին՝ չէ դե, մարդ են: Այստեղ խնդիր կա, բոլոր այն անձինք, ովքեր խախտում են օրենքը, պիտի պատասխանատվության ենթարկվեն իրենց արածի համար: Եթե կան նման դեպքեր, որ փաստաբաններն արգելված իրեր են ներառնում, ապա պետք է իրավական ընթացակարգով պատժեն այդ մարդկանց, ոչ թե դրա փոխարեն խուզարկեն բոլորին և իրավունքները ոտնահարելով փորձեն ինչ-որ բան ապահովել: