Եվրահանձնաժողովը հանդես է եկել ապօրինի ներգաղթյալների արտաքսման մասին խորհրդատվություններով

15:21 • 02.03.17

Եվրահանձնաժողովը հինգշաբթի հանդես է եկել անօրինական ներգաղթյալների վերադարձի վերաբերյալ ԵՄ անդամ երկրներին ուղղված խորհրդատվություններով՝ կոչ անելով ձերբակալել անօրինական ներգաղթյալներին արտաքսելուց առաջ, բարելավել գործընթացում ներգրավված ծառայությունների միջև համակարգումը, կանխել ապաստանի տրամադրման նորմերի չարաշահումները և մինչև 2017 թվականի հունիս սահմանել անօրինական ներգաղթյալների կամավոր վերադարձի ծրագիր: Այդ մասին հայտնում է «ՌԻԱ Նովոստի»-ն՝ վկայակոչելով Եվրահանձնաժողովի հայտարարությունը:


Եվրահանձնաժողովը, մասնավորապես, առաջարկում է ձերբակալությամբ կանխել նրանց գործողությունները, որոնք վերադարձի մասին որոշում են ստացել և ցույց են տալիս նշաններ, որ չեն իրականացնելու այդ որոշումը և հրաժարվելու են նույնականացման ժամանակ համագործակցությունից ու վերադարձի գործընթացին մասնակցությունից:


Անդամ երկրները պետք է կրճատեն նաև ապաստանի մերժման մասին որոշումների հարցով բողոքարկումների ժամանակահատվածը, նման որոշումները կայացնեն գործողության անսահմանափակ ժամկետով և պայքարեն ապաստանի տրամադրման համակարգի չարաշահման դեմ, որի ժամանակ ներգաղթյալներն ապաստանի դիմում են ներկայացնում ժամանակ շահելու համար:


Առաջարկվում է նաև հավասարեցնել ԵՄ անդամ երկրներում գործող անօրինական ներգաղթյալների վերադարձի ծրագրերի պայմանները, որպեսզի ներգաղթյալները չչարաշահեն այդ համակարգը՝ ընտրելով առավել հարմար երկրներ: