Մոսկովյան դատարանը 27 000 ռուբլի տուգանք է սահմանել սկանդալային սթրիթռեյսեր Մառա Բաղդասարյանի նկատմամբ

22:37 • 02.03.17

Մոսկովյան դատարանը վարչական տուգանքը ժամանակին չվճարելու համար սկանդալային սթրիթռեյսեր Մառա Բաղդասարյանին տուգանել է ևս 27 000 ռուբլի գումարով: Այս մասին հաղորդում է Gazeta.ru-ն` մեջբերելով դատարանի մամուլի քարտուղար Կոնստանտին Տիմոշենկոյի հաղորդագրությունը:

«Դատավորը Մ. Բաղդասարյանի դեմ հարուցված 12 վարչական իրավախախտման  նյութ է քննել, որոնց ուսումնասիրության արդյունքում հաշվի առնելով մեղմացուցիչ հանգամանքները`Մ. Բաղդասարյանի նկատմամբ վարչական տույժ է սահմանել 27 000 ռուբլի ծավալով գումարի տեսքով», - ասվում է դատարանի մամուլի հաղորդագրության մեջ:

Քարտուղարը հավելել է, որ Բաղդասարյանը դատական նիստին չի ներկայացել և միջնորդություն է ներկայացրել գործի քննությունն առանց իր ներկայության իրականացնելու մասին:

Հիշեցնենք, որ փետրվարի 27-ին դատարանը Բաղդասարյանի նկատմամբ ևս 8 տուգանք էր սահմանել` ընդհանուր 17 000 ռուբլի ծավալով: