Մենք բաց ճակատով մտնելու ենք ժողովրդի մեջ` բացատրելու, թե ինչու ենք մտել իշխանության մեջ. Արմեն Ռուստամյան

19:32 • 05.03.17

Այսօր «Հայ Յեղափոխական Դաշնակցության» քարոզարշավի մեկնարկին ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար, ՀՅԴ համամասնական ցուցակը գլխավորող Արմեն Ռուստամյանն այս ԱԺ ընտրությունները բացառիկ համարեց:

«Այս խորհրդարանը լինելու է այն շարժիչ ուժը, որը գործի է դնելու բոլոր այն բարեփոխումները, որոնց համար նախադրյալներ ենք ստեղծել Սահմանադրությամբ և օրենսդրությամբ: ՀՅԴ-ն չի գնալու առանձին ոլորտներում կամ առանձին խնդիրների վերաբերյալ խոստումներ տալու ճանապարհով, քանի որ ՀՅԴ-ն դատարկ խոստումներ երբեք չի տվել: Մենք այս ընտրապայքարի մեջ ենք մտնում արած գործը ներկայացնելու և ժողովրդից մանդատ հայցելու, որ կարողանանք շարունակել սկսած գործը»,-ասաց նա և նշեց, որ պարտավորություն ունեն սկսածն անշրջելի դարձնել: 

«ՀՅԴ-ն երբեք չի գնալու այն ճանապարհով, որ օգտագործենք ժողովրդի դժգոհությունը քաղաքական նպատակների համար, այլ գնալու ենք այն ճանապարհով, որ վերացնենք ժողովրդի դժգոհությունը՝ հանուն սերունդների, ինչը ամենադժվար ճանապարհն է: Սա նշանակում է հանրության առանձին հատվածներին չասել մի բան, որն իրենց քիմքին հաճելի է, բայց խնդիրներ ստեղծել մեկ այլ հատվածի մոտ: Սա է դասական պրիմիտիվ պոպուլիզմը, որով չենք առաջնորդվելու, որովհետև մենք մտածելու ենք հանրային ընդհանուր շահի մասին»,-ասաց նա և նշեց, որ այլևս չի լինի այն միակ նախագահական աթոռը, որի վրա նստողը ունենա ամբողջական իշխանություն: 

Արմեն Ռուստամյանն ասաց, որ ՀՅԴ-ն, մեծ համառությամբ կարողացավ խորհրդարանական համակարգի այդ առաջադեմ փորձը բերել Հայաստան: 

«Կան բոլոր հնարավորությունները, որ ընտրությունների միջոցով ժողովուրդը կարողանա փոխել իշխանություններին»,-ասաց նա: Նա նկատեց, որ իրենք չեն գնացել իշխանափոխության կոչերով ժողովրդին արկածախնդրության տանելու ճանապարհով, այլ հասկացել են մենիշխանության համակարգի վրա հենված ռեժիմը կամ կփոխվի դրսից` արյունահեղությամբ, ինչը իրենց համար անընդունելի է, կամ ներսից` համառ աշխատանքի արդյունքում: 

«Մենք բաց ճակատով ենք մտնելու ժողովրդի մեջ, բացատրելու, թե ինչու ենք մտել իշխանության մեջ: Հասկանալով որ դժգոհության մի մասը մեր վրա էլ է գալու, բայց մենք հասկացել ենք, որ ուրիշ ճանապարհ չկա, այդ դժգոհությունից ազատվելու համար»,-ասաց նա և նշեց, որ ժողովուրդը պետք է վեր կանգնի ամեն տեսակ ճնշումներից: