«30 քայլ, որ կփոխեն Հայաստանը». Արթուր Բաղդասարյանը ներկայացրեց ՀՎԿ-ի նախընտրական ծրագիրը (տեսանյութ)
Այսօր «Հայկական վերածնունդ» կուսակցության նախագահ, կուսակցության համամասնական ցուցակը գլխավորող Արթուր Բաղդասարյանը հայտնեց, որ իրենց նախընտրական ծրագրով 30 քայլ են նախատեսել, որ փոխեն Հայաստանը, բերեն բարեկեցության, իրականացնեն իրենց նպատակները:
«Մեր ծրագիրը մշակվել է բազմամյա քաղաքական փորձառությունը հաշվի առնելով»,-ասաց նա և նշեց, որ իրենք կարող են ապահովել տասնյակ միլիարդների դրամային հոսք ՀՀ բյուջե:
Ծրագրում ներառված է անցում պրոֆեսիոնալ բանակի. պատրաստվում են օրենք ընդունել, որ 18 տարեկաններին արգելվի տանել սահմանագիծ, իսկ պայմանագրային զինծառայողներին կվճարեն 800-1000 դոլար։
Արթուր Բաղդասարյանն անդրադարձավ ճանապարհային երթևեկության կանոնների խախտմանը և նշեց, որ անվտանգության համար տեղադրվող արագաչափի տուգանքը չպետք է գերազանցի հազար դրամը:
Անդրադառնալով փոքր ու միջին բիզնեսի խնդիրներին՝ կուսակցության նախագահն ասաց, որ պետությունը բիզնեսին չպետք է խանգարի, եթե չի կարողանում օգնել: ՀՎԿ-ն նաև առաջարկում է ազատականացնել նոտարական շուկան, ավանդների վերադարձի խնդիրը ավարտել, ներդնել շքեղության հարկ, աղետի գոտու ամբողջական վերականգնում, բանկային համակարգի բարեփոխումներ։
Բաղդասարյանը նշեց, որ առաջիկա երեք-չորս տարիների ընթացքում նախատեսում են նվազագույն աշխատավարձը հասցնել հարյուր հազար դրամի:
«Նախատեսում ենք կենսաթոշակների բարձրացում` հասցնելով նվազագույն սպառողական զամբյուղի մակարդակին»,-ասաց նա և խոստացավ նաև կոմունալ ծառայությունների սակագների նվազեցում, բնակչությանը մատուցվող ծառայությունների շուկայի ազատականացում, հայրենադարձության խթանում:
«Մենք, միևնույն է, հաղթելու ենք, մենք այսքան տարի հաղթել ենք։ Մենք դնում ենք մի նշաձող, որ հնարավորություն կտա մեր ծրագրերը կյանքի կոչել։ Դրա համար հավատալ և պայքարել է պետք «Հայկական վերածնունդ» կուսակցության հաղթանակի համար»,-ասաց նա:










