Մենք եղել ենք, կանք ու պարտավոր ենք մնալ ռուս ժողովրդի հետ, մեր խնդիրը գենոֆոնդը պաշտպանելն է. կոմկուս (տեսանյութ)

20:51 • 07.03.17

Մեր խնդիրը ժողովրդի գենոֆոնդը պաշտպանելն է, իսկ դա կարող ենք անել միայն ու միայն ռուս ժողովրդի և ԵԱՏՄ մյուս երկրների հետ. Tert.am-ի հետ զրույցում այս մասին ասաց Հայաստանի Կոմունիստական կուսակցության կենտկոմի առաջին քարտուղար Տաճատ Սարգսյանը՝ հորդորելով իրեն դիմել ոչ թե «պարոն»-ով, այլ՝ «ընկերով»: «Կոմունիստները կան և եղել են ընկեր»,- ասաց Տաճատ Սարգսյանը:

Հարցին՝ ինչո՞ւ է նախընտրական ծրագրում անընդհատ համեմատական արվում խորհրդային տարիների հետ, շեշտվում այն տարիների ձեռքբերումները, ապա Տաճատ Սարգսյանը պատասխանեց, թե զուր են մեղադրում իրենց՝ ԽՍՀՄ նկատմամբ կարոտախտի մեջ, որովհետև իրենք վերադառնալ չեն փորձում:

«Մենք կարծում ենք, որ եթե մարդ իր կատարած աշխատանքին հետ հայացք չնետի, առաջ գնալ չի կարող: Այսօր շատ կուսակցություններ ուզում են ներկայացնել իրենց աշխատանքը, ասում են, թե որ գան իշխանության՝ կասեն, ինչ են անելու, դաշինքներ են կազմվել, որոնք գաղափարական հենք չունեն, բայց անունը դաշինք են դրել, որ մտնեն խորհրդարան, իսկ մենք 104-ամյա կուսակցություն ենք, տարբեր տարիներին կարողացել ենք գոյատևել, ապրել»,- ասաց Տ. Սարգսյանը:

Կոմունիստն ասաց, որ եթե նոր մեթոդներ կիրառվեն, ապա ժողովուրդը դուրս կգա ստեղծված իրավիճակից, սոցիալական վիճակը կբարելավվի, տնտեսական աճ կգրանցի, աշխատատեղեր կբացվեն:

«Ասում են, թե մտնելով ԵԱՏՄ մեջ, վիճակը չի բարելավվում: Դա չի բարելավվում մեր իշխանությունների անպատասխանատու, ոչ բարեխիղճ աշխատանքի պատճառով: Եթե կարողանանք օգտագործել ԵԱՏՄ հնարավորությունները, ներդրումներ կատարենք, մեկը դարձնենք երկուս, արտահանենք, վաճառենք, ամեն ինչ նորմալ կլինի»,- ասաց Տաճատ Սարգսյանը:

Հարցին՝ ԱԺ-ում մեծամասնություն կազմելու նպատակ ունի՞, խոստովանեց, որ խորհրդարանում մեծամասնություն կազմել չեն կարող, բայց ԱԺ մտնելուց հետո համագործակցելու են առողջ ուժերի հետ, ովքեր կարծում են, որ սոցիալական այս վիճակից ժողովրդին հանել է պետք:

Կոմունիստը նկատեց, որ իրենք չեն համագործակցի այն դաշինքների հետ, ովքեր համագործակցում են միմյանց հետ, բայց գաղափարական հենք չունեն: «Չեմ կարծում, որ ԱԺ չանցնեն ուժեր, որոնց հետ համագործակցել չկարողանան: Բայց կան ուժեր, որոնք ուզում են Հայաստանը տանել դեպի Եվրոպա: Նրանք մոռացել են փորձը, երբ ազգը կոտորվում էր, որ ինչ անենք, որ մեր նավերը ձեր սարերը չեն բարձրանում: Մենք եղել ենք, կանք ու պարտավոր ենք մնալ ռուս ժողովրդի հետ: Մեր խնդիրը ժողովրդի գենոֆոնդը պաշտպանելն է, իսկ դա կարող ենք անել միայն ու միայն ռուս ժողովրդի և ԵԱՏՄ մյուս երկրների հետ»,- ասաց նա՝ նշելով, որ Արևմուտքի հետ Հայաստանը կարող է համագործակցել:

Մանրամասները՝ տեսանյութում։