ՄԱԿ-ում քննադատել են Թրամփի նոր միգրացիոն հրամանագիրը

09:49 • 07.03.17

ՄԱԿ-ի Փախստականների իրավունքների հարցերով գերագույն հանձնակատար Ֆիլիպո Գրանդին մտահոգված է փախստականների վերաբերյալ ԱՄՆ նախագահ Դոնալդ Թրամփի նոր հրամանագրի առնչությամբ: Այդ մասին հայտնում է կազմակերպության լրատվական կենտրոնը, գրում է korrespondent.net-ը:


«Փախստականները սովորական մարդիկ են, որոնք ստիպված են փրկվել պատերազմներից և հետապնդումներից: Նրանք պաշտպանության և օգնության կարիք ունեն»,- հայտարարել է Գրանդին:


Նրա խոսքով՝ Թրամփի նոր որոշումը, անգամ ժամանակավոր, միայն կվատթարացնի նրանց տանջանքները:


Գրանդին նշել է, որ ԱՄՆ-ն միշտ օրինակ է եղել ուրիշների համար՝ օգնելով այլ երկրներում փախստականներին և իրենց մոտ ընդունելով նրանց, ովքեր անվտանգություն են փնտրում: Այսօր, երբ տեղահանվածների թիվը հասել է ռեկորդային մակարդակների, մարդասիրության նման օրինակը հարկավոր է՝ ինչպես երբևէ, ընդգծել է ՄԱԿ-ի հանձնակատարը:


Ավելի վաղ հաղորդվել է, որ ԱՄՆ նախագահ Դոնալդ Թրամփը նոր հրամանագիր է ստորագրել, որի համաձայն 90 օրով դադարեցվում է առավելապես մահմեդական բնակչություն ունեցող երկրների` Իրանի, Եմենի, Լիբիայի, Սիրիայի, Սոմալիի և Սուդանի քաղաքացիների մուտքն ԱՄՆ: 


Ի տարբերություն նախորդ հրամանագրի` այժմ երկրների «սև ցուցակում» բացակայում է Իրաքը: Բացի այդ, ԱՄՆ-ում փախստականների ընդունելության ծրագիրը կդադարեցվի 120 օրով: Արդեն տրամադրված վիզաները կամ ԱՄՆ-ում ժամանակավոր կացության թույլտվությունը չի չեղարկվի. դրանց տերերին թույլ կտրվի մուտք գործել ԱՄՆ կամ մնալ երկրում` այնտեղ գտնվելու դեպքում:


Հրամանագիրն ուժի մեջ կմտնի մարտի 16-ին: