Կիևում դատարանը 60-օրյա կալանք է սահմանել Ուկրաինայի ֆիսկալային ծառայության ադրբեջանցի ղեկավարի նկատմամբ
Կիևի շրջանային դատարանը 60 օրով կալանավորել է Ուկրաինայի պետական ֆիսկալային ծառայության ադրբեջանցի ղեկավար Ռոման Նասիրովին և 100 միլիոն գրիվնայի չափով գրավ սահմանել, հայտնում է «Ուկրաինսկայա պրավդա»-ն:
Բացի այդ, դատարանը Նասիրովի համար մի շարք պարտավորություններ է սահմանել, մասնավորապես՝ առանց դատախազի և դատարանի թույլտվության՝ դուրս չգալ Կիևի սահմաններից, չշփվել կասկածյալների հետ, հանձնել անձնագրերը և այլ փաստաթղթեր, որոնք թույլ են տալիս դուրս գալ երկրի սահմաններից: Բացի այդ, Նասիրովը պարտավոր է էլեկտրոնային թևնոց կրել:
Ավելի վաղ հաղորդվել է, որ Ուկրաինայում ձերբակալվել է Պետական ֆիսկալային ծառայության ադրբեջանցի ղեկավար Ռոման Նասիրովը՝ Գերագույն ռադայի պատգամավոր Ալեքսանդր Օնիշչենկոյի գործով: Ուկրաինայի պետական ֆիսկալային ծառայության ղեկավարը կասկածվում է գործողությունների համար, որոնք պետությանը 2 միլիարդ գրիվնայի վնաս են հասցրել:
Քննության տեղեկության համաձայն՝ Նասիրովն անհիմն որոշումներ է կայացրել օգտակար հանածոների արդյունահանման համար վարձակալության վճարի հետաձգման մասին: Դա օգնել է պատգամավոր Ալեքսանդր Օնիշչենկոյին կյանքի կոչել կոռուպցիոն մեխանիզմներ:
Ձերբակալությունը տեղի է ունեցել Կիևում գտնվող հիվանդանոցներից մեկում, երբ Նասիրովն անգիտակից վիճակում է եղել:










