Ամերիկացին մեղադրվել է մանեկենի նկատմամբ մահափորձի համար

16:26 • 08.03.17

ԱՄՆ-ի Նևադա նահանգի Լաս Վեգաս քաղաքում տղամարդը մեղադրվել է մանեկենը սպանելու փորձի մեջ: Հայտնի է, որ մանեկենն օգտագործվել է որպես խայծ` երկու քնած անօթևաններին սպանողին բռնելու համար: Մանեկենը տեղադրվել է քաղաքի կենտրոնական թաղամասերից մեկում, որտեղ ավելի վաղ անօթևաններ էին սպանվել՝ գլխին ստացած վնասվածքներից։

Associated Press-ը գրում է, որ մեղադրանքները ներկայացվել են 30-ամյա Շեյն Ալլեն Շինդլերին. դատական լսումների ժամանակ դատավորը որոշել է, որ պետք է ստուգվի կասկածյալի գործունակությունը:

Հասարակական պաշտպան Ֆիլ Կոնը ծաղրել է այդ մեղադրանքները` նշելով, որ անհնար է սպանել անշունչ առարկան:

Շինդլերի խոսքով` հարձակման պահին ինքը գիտակցել է, որ իր զոհը մանեկեն է: Նա այս մասին հայտնել է ոստիկանությանը ձերբակալությունից հետո:

Դատախազի տեղակալ Մարկ Դի Ջակոմոի կարծիքով` մեղադրյալը ստում է, քանի որ նա չէր կարող իմանալ, որ մուրճով հարվածում է մանեկենին. տիկնիկը ծածկված է եղել վերմակով:

Նշվում է, որ Շինդլերը գտնվում է կալանքի տակ: Նրա փաստաբանը հրաժարվել է մեկնաբանություններ տալուց: