Կառավարությունը Վահան Շիրխանյանին վերաբերող փաստաթղթերի կեսից պակասն է ներկայացրել ՄԻԵԴ. Հայկ Ալումյան
ՀՀ կառավարությունը ՀՀ նախկին փոխվարչապետ և պաշտպանության նախկին փոխնախարար, Նորք Մարաշի խմբի գործով ամբաստանյալ Վահան Շիրխանյանի հետ կապված Մարդու իրավունքների եվրոպական դատարան է ներկայացրել համապատասխան փաստաթղթերի կեսից պակասը:
Այս մասին այսօր լրագրողների հետ զրույցում ասաց Նորք Մարաշի զինված խմբի գործով ամբաստանյալ Վահան Շիրխանյանի պաշտպան Հայկ Ալումյանը:
«Մինչև փետրվարի 22-ը ՀՀ կառավարությունը պարտավորված է եղել ներկայացնել փաստաթղթեր Վահան Շիրխանյանի առողջական իրավիճակի վերաբերյալ և ներկայացրել է փաստաթղթերը: Եվրոպական դատարանը պահանջել էր բոլոր փաստաթղթերը, սակայն Կառավարությունը փորձել է տպավորություն ստեղծել, թե ներկայացրել է բոլոր փաստաթղթերը, այնինչ դրանք եղած փաստաթղթերի կեսից պակաս են»,-ասաց Ալումյանը:
Փաստաբանը հայտնեց, որ դրանից հետո Եվրոպական դատարանը սովորական ընթացակարգի համաձայն Կառավարության պատասխանները ներկայացրել է դիմող կողմի փաստաբաններին և առաջարկել Կառավարության դիրքորոշման վերաբերյալ ներկայացնել առարկություններ, եթե այդպիսիք կան:
«Դիմող կողմի փաստաբանները ներկայացրել են առարկությունները, և անտեղ շատ պարզ, հիմնավոր ձևով ներկայացվել են այն անհամապատասխանությունները, որոնք կան կառավարության դիրքորոշման մեջ»,-ասաց նա։
Հարցին, թե Վահան Շիրխանյանն այսօր ինչո՞ւ չի ներկայացել դատին, Հայկ Ալումյանն ասաց, որ Վահան Շիրխանյանի առողջական վիճակն այնպիսին է, ինչպես նախորդ դատական նիստի ժամանակ, այսինքն՝ ոչինչ չի փոխվել:
Հիշեցնենք, որ պաշտպանության նախարարի նախկին տեղակալ Վահան Շիրխանյանին մեղադրանք է ներկայացվել Քրեական օրենսգրքի 223-րդ հոդվածի 2-րդ մասով՝ «Հանցավոր համագործակցությանը մասնակցելը», որը պատժվում է ազատազրկմամբ՝ 6-10 տարի ժամկետով:










