Սեուլում նախագահի պաշտոնանկության դեմ ցույցերի ընթացքում երկու մարդ է մահացել
Հարավային Կորեայի ոստիկանությունը հայտնել է նախագահ Պակ Կըն Հեի պաշտոնանկության մասին դատարանի որոշման դեմ բողոքի ցույցերի ընթացքում գրանցված երկու զոհի մասին: Այդ մասին հայտնում է BBC-ի ռուսական ծառայությունը:
Լրատվական գործակալությունների հաղորդմամբ՝ զոհերից մեկը 72-ամյա տղամարդ է, որը ստացել է գլխի բազմաթիվ վնասվածքներ՝ դուրս ընկնելով ոստիկանական ավտոբուսից:
Երկրորդ զոհի ինքնության մասին տեղեկություններ չկան:
Հաղորդվում է նաև, որի բողոքի ցույցերի ընթացքում մի քանի լրագրող է վիրավորվել: Մասնավորապես՝ գլխի շրջանում վնասվածքներ է ստացել ճապոնական «Կիոդո» գործակալության օպերատորը:
Ավելի վաղ հաղորդվել է, որ Հարավային Կորեայի սահմանադրական դատարանը հաստատել է նախագահ Պակ Կըն Հեին պաշտոնանկ անելու գործընթացը՝ խոշոր կոռուպցիոն սկանդալի պատճառով նրան հեռացնելով ղեկավարի պաշտոնից: Այդ որոշումը նշանակում է, որ Պակ Կըն Հեն անմիջապես կհեռացվի իշխանությունից և կարող է ենթարկվել քրեական հետապնդման՝ կոռուպցիայի մեղադրանքներով:
Դրանից հետո նախագահի հազարավոր աջակիցներ դուրս են եկել փողոց: Նրանցից մի քանիսն իրենց ագրեսիվ են պահել, բախման մեջ են մտել ոստիկանների հետ և բարձրացել ոստիկանական մեքենաների վրա, որոնք կանգնեցվել էին դատարանը շրջափակելու համար:
Երկրի սահմանադրության համաձայն՝ նոր նախագահական ընտրությունները կայանալու են 60 օրից:
Ավելի վաղ՝ դեկտեմբերի 9-ին, Հարավային Կորեայի խորհրդարանը կողմ էր քվեարկել նախագահի պաշտոնանկության գործընթացը սկսելուն, ինչի հետևանքով երկրում ներքաղաքական ճգնաժամ էր սկսվել:
65-ամյա Պակ Կըն Հեն իր մտերիմ ընկերուհու հետ ստիպել է խոշոր ընկերություններին՝ այդ թվում նաև Samsung-ին, մեծ գումարներ փոխանցել իրենց հիմնած հիմնադրամներին: Բացի այդ, նախագահը մեղադրվում է Samsung Group-ի ղեկավարից կաշառք վերցնելու ու դրա դիմաց ընկերությանը լայն արտոնություններ տրամադրելու համար:










