Մեծ Բրիտանիայի թագավորական ընտանիքը՝ Լոնդոնում պատերազմների զոհերին նվիրված հուշարձանի բացմանը (լուսանկարներ, տեսանյութ)
Մեծ Բրիտանիայի մայրաքաղաք Լոնդոնում մարտի 9-ին բացվել է Պարսից ծոցի, Իրաքի և Աֆղանստանի պատերազմների ժամանակ զոհված զինծառայողներին և խաղաղ բնակիչներին նվիրված հուշարձան: Հանդիսավոր արարողությանը մասնակցել է մոտ 2,5 հազար մարդ՝ այդ թվում թագավորական ընտանիքը և վարչապետ Թերեզա Մեյը: Հուշարձանի ծածկոցը հանել է թագուհի Էլիզաբեթ Երկրորդը, հայտնում է Mirror-ը:
Աղբյուրի հաղորդմամբ` Լեյբորիստական կուսակցության նախկին առաջնորդ Թոնի Բլեերի ներկայությունը զայրացրել է արարողության որոշ հյուրերի, քանի որ զոհվածների ընտանիքների անդամները մինչ օրս չեն ներել նրա անհմուտ քաղաքական գործողությունները:
Նշվում է, որ հուշարձանը տեղադրվել է Թեմզա գետի ափին տեղակայված պուրակում` Երկրորդ համաշխարհային պատերազմի և Կորեական պատերազմի հուշարձանների մոտակայքում: Հուշարձանը կազմված է պատերազմական գործողությունների գոտիները խորհրդանշող երկու խոշոր քարից, որոնք պարփակում են երկկողմանի բրոնզե միջուկը` նվիրված «պարտքին և ծառայությանը»:
«Իրաքում և Աֆղանստանում առաքելությունները մեր հազարավոր զինվորներին կոչ են արել իրենց կյանքերը զոհաբերել` հերոսական ջանքերի շնորհիվ խաղաղություն և կայունություն պահպանելով մեր իմացած ամենաթշնամական վայրերում: Այսօր մենք հարգում ենք այն բրիտանացի կանանց և տղամարդկանց արտասովոր քաջության և նվիրվածության հիշատակը, որոնք ընդունել են այդ կոչը: Մենք հարգանքի տուրք ենք մատուցում այն ընտանիքներին, որոնք երկար ժամանակ մասնատված են եղել, և աջակցություն ենք հայտնում իրենց սիրելիներին կորցրած մարդկանց», - ասել է Մեծ Բրիտանիայի վարչապետ Թերեզա Մեյը հուշարձանի բացման արարողության ժամանակ:



















