Մալայզիայում դեռ չեն որոշել՝ ինչ անել Կիմ Չեն Ընի սպանված եղբոր մարմնի հետ

11:58 • 11.03.17

Մալայզիայի իշխանությունները դեռևս չեն որոշել, թե ինչ են անելու Հյուսիսային Կորեայի առաջնորդ Կիմ Չեն Ընի սպանված եղբոր՝ Կիմ Չոն Նամի մարմնի հետ։ Այս մասին հայտարարել է երկրի առողջապահության փոխնախարար Խիլմի Յահայան, գրում է gazeta.ru կայքը:

Հայտնի է, որ դատաբժշկական փորձաքննությունն ավարտվել է մարտի 10-ին, որից հետո ոստիկանությունը Նամի մարմինը հանձնել է երկրի առողջապահության նախարարությանը:

Երկրի օրենսդրությունը ժամկետային սահմանափակումներ չի սահմանում մահացածի մարմնի արտահանձնման հետ կապված, ընդ որում՝ մարմինը հանձնվում է միայն մտերիմ ազգականներին:

«Հաշվի առնելով ստեղծված իրավիճակը՝ մեզ ժամանակ է պետք որոշում կայացնելու համար», - ասել է մալայզիացի պաշտոնյան:

Հիշեցնենք, որ փետրվարին Մալայզիայում սպանվել է Հյուսիսային Կորեայի ղեկավար Կիմ Չեն Ընի եղբայրը՝ Կիմ Չոն Նամը, որն իր կյանքի վերջին մի քանի տարին անցկացրել է հայրենիքի սահմաններից դուրս՝ թաքնվելով եղբոր գլխավորած բռնապետական ռեժիմից: Հաղորդվում է, որ նա սպանվել է Կուալա Լումպուրի օդանավակայանում` թունավոր նյութի օգնությամբ: Ամերիկացի և հարավկորեացի փորձագետների կարծիքով` վերջինիս սպանությունն իրագործվել է ԿԺԴՀ-ի հատուկ գործակալների պատվերով: 

Մալայզիայում Հյուսիսային Կորեայի դեսպանը սպանության հաջորդ օրը հանդես էր եկել հայտարարությամբ և ասել, թե Կուալա Լումպուրի օդանավակայանում սպանվածն իրականում Կիմ Չեն Ընի եղբայրը չէ, այլ՝ մեկ ուրիշ հյուսիսկորեացի: