Մենք աշխատում ենք առանց խոստումների, բնակչությունը մեր աշխատաոճը շատ լավ գիտի. Տարոն Մարգարյան
Ավանի Մշակույթի տանը ՀՀԿ նախընտրական քարոզարշավի շրջանակներում ելույթ ունեցավ Երևանի քաղաքապետ Տարոն Մարգարյանը, ով նախ շնորհակալություն հայտնեց ավանցիներին, որ եղել են միշտ ՀՀԿ-ի կողքին, որը երբևիցե չի վախեցել և պատասխանատվությունից չի խուսափել:
Նա ասաց, որ թեև կան շատ սոցիալական խնդիրներ, բայց «Հանրապետական» կուսակցությունը ներկայացնում է իր հստակ ծրագիրը այն անելիքների մասին, որոնք ապագա սերնդին, վաղվա օրվան, երեխաներին են ուղղված:
«Մենք վստահ ենք, համոզված ենք, որ այդ ծրագրերը իրականություն են դառնալու, մենք վստահում ենք վարչապետի ներկայացրած փոփոխություններին և հավատում ենք, որ կարճ ժամանակ անց մենք մեր մաշկի վրա դա զգալու ենք: Ուզում եմ կոչ անել վստահեք այն ուժին, որը չի խուսափում պատասխանատվությունից, որը աշխատել է և աշխատում է օր ու գիշեր»,-ասաց նա և նշեց, որ դեռ անելիքներ շատ կան և միասին պետք է երկիրը կառուցեն:
«Մենք չենք եկել խոստումներով, մեր աշխատաոճը երևանցիները, բնակչությունը շատ լավ գիտի: Մենք աշխատում ենք առանց խոստումների, մենք քննարկում ենք ժողովրդի հետ և ժողովրդի խորհուրդներով ենք առաջնորդվում: Համոզված եմ, որ ապրիլի 2-ին երևանցիները, ավանցիները այն ուժին կվստահեն, որը ունի մեծ ու փորձառու թիմ և պատրաստ է պատասխանատվություն կրել: Մենք ուզո՞ւմ ենք ունենալ անվտանգ երկիր, այո, ցանկանում ենք ունենալ առաջընթաց, այո, դե բոլորս միասին պետք է վստահենք դա իրականացնողներին»,- ասաց նա:










