ԵԱՏՄ-ի և Իրանի միջև ազատ առևտրի գոտու մասին համաձայնագիրը կարող է պատրաստ լինել մարտին Մոսկվա Իրանի նախագահի այցին ընդառաջ

16:09 • 13.03.17

Եվրասիական տնտեսական միության և Իրանի միջև ազատ առևտրի գոտու մասին փաստաթուղթն այժմ քննարկվում է Թեհրանում, այն կարող է պատրաստ լինել մարտին Իրանի նախագահ Հասան Ռոհանիի Մոսկվա այցին ընդառաջ: Այդ մասին հայտնել է առևտրա-տնտեսական համագործակցության հարցերով ռուս-իրանական միջկառավարական հանձնաժողովի համանախագահ Ալեքսանդր Նովակը, գրում է «ՌԻԱ Նովոստի»-ն:


«Երեկ և այսօր Թեհրանում է գտնվում Իրանի և Եվրասիական տնտեսական միության միջև ազատ առևտրի գոտու մասին համաձայնագրի դիտարկման հարցով պատվիրակությունը, ընթանում է փաստաթղթի տեքստի համաձայնեցման ակտիվ աշխատանք։ Հուսով ենք, որ մինչև Մոսկվա Իրանի նախագահի այցը փաստաթուղթը պատրաստ կլինի ստորագրման համար»,- ասել է Նովակը՝ բացելով միջկառավարական հանձնաժողովում իր գործընկերոջ՝ Իրանի կապի նախարար Մահմուդ Վաեզիի հետ հանդիպումը:


Եվրասիական միջկառավարական խորհրդի մասնակիցներն անցած շաբաթում Բիշքեկում ստորագրել են ԵԱՏՄ-ի և Իրանի միջև ազատ առևտրի գոտու ստեղծման մասին ժամանակավոր համաձայնագրի նախապատրաստման ուղղությամբ աշխատանքները կազմակերպելու մասին հրամանագիր: