Ռուսաստանը Եգիպտոսում հատուկջոկատայիններ և անօդաչուներ է տեղակայել. Reuters
Ռուսաստանը հատուկ նշանակության զորախմբեր է տեղակայել Եգիպտոսի արևմուտքում գտնվող «Սիդի Բարանի» ավիաբազայում՝ Լիբիայի սահմանի մոտ: Այս մասին հայտնում է Reuters-ը՝ ամերիկյան և եգիպտական դիվանագիտական աղբյուրներին հղումով:
Կողմերի կարծիքով՝ այսկերպ Մոսկվան իր աջակցությունն է հայտնում լիբիական բանակի հրամանատար Խալիֆ Հաֆթարին, որի դեմ մարտի սկզբին հարձակում էին գործել Բենգազիի ինքնապաշտպանական բրիգադները:
Ամերիկյան կողմի փոխանցմամբ՝ Ռուսաստանը Լիբիայի սահմանից 100 կմ հեռավորության վրա գտնվող ավիաբազայում հատուկջոկատայիններ է տեղակայել՝ 22 հոգի, ինչպես նաև անօդաչու թռչող սարքեր:
Մինչդեռ Եգիպտոսի պաշտպանության նախարարության խոսնակը հայտարարել է, որ իրենց երկրում ոչ մի օտարերկրացի զինվոր չկա, քանի որ դա ինքնիշխանության հարց է:
Ռուսաստանի պաշտպանության նախարարությունը դեռևս չի մեկնաբանել տեղեկությունը:
Reuters-ը նկատում է, որ Արևմուտքը խիստ անհանգստացած է վերջին շրջանում Ռուսաստանի և Լիբիայի ներկայացուցիչների միջև ակտիվ շփումներով:
Նշենք, որ Հաֆթարը պայքարում է իսլամիստների դեմ, նրա ղեկավարած զորքերը Բենգազիում կռվում են «Իսլամական պետություն» ահաբեկչական խմբավորման դեմ: Հայտնի է, որ 2016թ. Հաֆթարն այցելել է Մոսկվա:










