ԵՄ առաջնորդները խիստ քննադատության են ենթարկել Թուրքիային՝ Նիդեռլանդների և Գերմանիայի հետ վեճի ֆոնին
Թուրքիայի կողմից Նիդեռլանդներին ուղղված ֆաշիզմի մեղադրանքները «կտրված են իրականությունից»: Այդ մասին հայտարարել է Եվրոպական խորհրդի նախագահ Դոնալդ Տուսկը, հայտնում է Hurriyet Daily News-ը:
Թուրքիան նման հայտարարություններով էր հանդես եկել այն բանից հետո, երբ Նիդեռլանդներն արգելել էր Ռոտերդամում սահմանադրական փոփոխությունների վերաբերյալ հանրաքվեին ընդառաջ թուրք քաղաքական գործիչների հանրահավաքները:
«Ռոտերդամը, որն ամբողջովին ավերվել է նացիստների կողմից, այժմ ունի քաղաքապետ, որը ծնվել է Մարոկկոյում: Եթե մեկը ֆաշիզմ է տեսնում Ռոտերդամում, նա բոլորովին կտրված է իրականությունից»,- ասել է Տուսկը Եվրախորհրդարանի լիագումար նիստում:
Իր հերթին՝ Եվրահանձնաժողովի նախագահ Ժան-Կլոդ Յունկերն անթույլատրելի է համարել Թուրքիայի կողմից Գերմանիայի և Նիդեռլանդների հասցեին նացիզմի և ֆաշիզմի մեղադրանքները:
«Դա բոլորովին անթույլատրելի է»,- ասել է նա լիագումար նիստի ժամանակ:
«Ոչ թե Եվրամիությունն է միանում Թուրքիային, այլ Թուրքիան է միանում Եվրամիությանը»,- ասել է Յունկերը:
Հիշեցնենք, որ մարտի 11-ին Նիդեռլանդների վարչապետը թույլ չէր տվել, որպեսզի Թուրքիայի ԱԳ նախարար Մևլութ Չավուշօղլուի օդանավը վայրէջք կատարի Ռոտերդամում, որտեղ նա մտադիր էր Թուրքիայում կայանալիք սահմանադրական բարեփոխումների հանրաքվեի թեմայով հանրահավաք անցկացնել տեղի թուրքերի հետ:
Նույն նպատակով, սակայն արդեն ցամաքային ճանապարհով, Նիդեռլանդներ էր մեկնել Թուրքիայի ընտանիքի հարցերով նախարար Ֆաթմա Բեթյուլ Սայյան Կայան, որի մեքենան կանգնեցրել են Ներքին գործերի նախարարության աշխատակիցները՝ թույլ չտալով առաջ շարժվել: Այնուհետև Նիդեռլանդների իշխանությունները նրան «անցանկալի անձ» են հայտարարել ու արտաքսել երկրից:
Անցած շաբաթ Գերմանիայում չեղարկվել են թուրք նախարարների մասնակցությամբ քաղաքական միջոցառումները, որոնց նպատակն էր հանդիպել գերմանաբնակ թուրքերին ու նրանց համոզել Թուրքիայում կայանալիք սահմանադրական բարեփոխումների թեմայով հանրաքվեի ժամանակ «այո» քվեարկել: Արգելքի սահմանումը զգալի լարվածություն է առաջացրել Գերմանիայի և Թուրքիայի հարաբերություններում: Անկարայում արգելքը համեմատել են նացիստների գործողությունների հետ:










