Թրամփի դուստրը բաց է թողել հոր հանրահավաքը Կանադայի վարչապետի հետ Բրոդվեյ գնալու համար. The Daily Mail (լուսանկարներ)
Ամերիկյան Բրոդվեյում կայացել է փախստականների թեմային նվիրված Come From Away ներկայացման պրեմիերան, որին ներկա են եղել Կանադայի վարչապետ Ջասթին Տրյուդոն և ԱՄՆ նախագահ Դոնալդ Թրամփի ավագ դուստրը՝ Իվանկա Թրամփը:
Ինչպես նշում է The Daily Mail-ը, 35-ամյա Իվանկան, որը դեղին մամուլի պնդմամբ՝ շատ է տպավորվել Տրյուդոյով իրենց առաջին հանդիպման ժամանակ, հատուկ այս միջոցառմանը ներկա գտնվելու համար հրաժարվել է մասնակցել Նեշվիլում հոր կազմակերպած հանրահավաքին:
Նշվում է, որ ներկայացման ցուցադրության ժամանակ Տրյուդոյի մի կողմում նստած է եղել կինը, իսկ մյուս կողմում՝ Իվանկա Թրամփը:
The Daily Mail-ը հիշեցնում է, որ ավելի վաղ համացանցի բազմաթիվ օգտատերեր, տեսնելով, թե Սպիտակ տան հրապարակած լուսանկարներում Իվանկան ինչ երանելի հայացքով է նայում Կանադայի վարչապետին, սկսել էին կատակել, թե ԱՄՆ-ի նախագահի դուստրն անկարող է դիմակայել Տրյուդոյի հմայքին:
Նշենք, որ Իվանկա Թրամփն ամուսնացած է և ունի 3 երեխա: Նրա ամուսինը՝ միլիոնատեր Ջարեդ Քուշները, աշխատում է Սպիտակ տանը՝ որպես նախագահի ավագ խորհրդական:
















