ԱՄՆ-ում դպրոցականը 7.44 կարատանոց ալմաստ է գտել (լուսանկար)
ԱՄՆ Արքանզաս նահանգում 14-ամյա դեռահաս Քալել Լենգֆորդը հայտնաբերել է 7.44 կարատանոց ալմաստ, գրում է foxnews.com-ը՝ մանրամասնելով, որ ուշագրավ հայտնագործությունն արվել է նահանգի պետական այգում (Crater of Diamonds State Park):
Նշվում է, որ 1972թ. ի վեր գործող այգու պատմության ընթացքում սա հայտնաբերված 7-րդ ամենամեծ ալմաստն է, որի արժեքի մասին դեռևս ոչինչ հայտնի չէ:
Դեռահասի հայրը պատմել է, որ իրենք այգում մոտ կես ժամ են անցկացրել, ինչից հետո Քալելը գտել է թանկարժեք քարը:
«Դրա գույնն այնքան մուգ էր, որ սկզբում մենք չհասկացանք, թե դա ինչ է»,-պատմել է Քրեյգ Լենգֆորդը:
Հայտնի է, որ դպրոցականը քարն անվանել է «Սուպերմենի ադամանդ» ու մտադիր է այն որպես թանկ հուշանվեր պահել:
Աղբյուրը մանրամասնում է, որ Միացյալ Նահանգներում երբևէ հայտնաբերված (1924թ.) ամենամեծ ալմաստն ունեցել է 40.23 կարատ քաշ ու կոչվել «Քեռի Սեմ»:











