Գլենդեյլում բանկի նախկին ամերիկահայ մենեջերը մեղավոր է ճանաչվել ավելի քան 1,6 մլն դոլարի լվացման գործով

11:28 • 17.03.17

ԱՄՆ դաշնային դատարանն ուրբաթ Գլենդեյլում գտնվող Wells Fargo բանկի նախկին մենեջեր Ալբերտ Յագուբյանին մեղավոր է ճանաչել 1,66 միլիոն դոլարի լվացման գործով: Այդ մասին հայտնում է Los Angeles Times-ը՝ վկայակոչելով ԱՄՆ արդարադատության նախարարությանը:


Դատավորը մեղավոր է ճանաչել Բըրբենքի 37-ամյա բնակիչ Ալբերտ Յագուբյանին փողերի լվացման հարցում պայմանավորվածության գալու, փողերի լվացումը թաքցնելու չորս դեպքի և կեղծ բանկային տվյալներ մուտք գործելու համար:


Յագուբյանը մասնակցել է ավելի քան 1 միլիոն դոլար արժողությամբ միջոցների լվացմանը Գլենդեյլի երկու բնակիչների հետ միասին: Երկու տղամարդիկ՝ 37-ամյա Արտաշես Դարբինյանը և 42-ամյա Օրբել Հակոբյանը, մեղավոր էին ճանաչվել անցած տարվա վերջին՝ խարդախությանն իրենց մասնակցության համար:


Խարդախությունը, որը կազմակերպվել է դեռևս 2013 թվականին, իրենից ներկայացրել է գումարների շորթում էլեկտրոնային փոստի միջոցով՝ մի քանի կեղծ ընկերությունների օգտագործմամբ, որոնք պոտենցիալ զոհերին 385 դոլարի դիմաց օգնություն են առաջարկել ապրանքանիշերի խախտումների վերահսկողության և ապրանքանիշ գրանցելու հարցում:


Արդարադատության նախարարության պաշտոնյաների խոսքերով՝ Յագուբյանն օգնել է գումարների լվացման հարցում՝ հանձնարարելով բանկի աշխատողներին բացել կեղծ էջեր, որտեղ հավաքված գումարներն ի պահ կհանձնվեն:


Նշվում է, որ գումարներն այնուհետև օգտագործվել են ոսկի գնելու համար: Դարբինյանը նաև Յագուբյանին լվացված գումարներից տոկոս է վճարել:


«Յագուբյանն, իր հերթին, վճարումներ է արել և առաջընթացի խոստումներ տվել իր ենթականերին՝ դրդելով նրանց կատարել կեղծ գործարքներ»,- նշվում է հայտարարությունում:


Wells Fargo բանկի նախկին մենեջերը ձերբակալվել է անցած տարվա հուլիսին՝ այն բանից հետո, երբ բանկն ի վերջո հայտնաբերել է կեղծ հաշիվները: Նրա դատավճիռը կընթերցվի մայիսի 22-ին: