Նեթանյահուն ասել է՝ ինչու էին իսրայելական ինքնաթիռները մտել Սիրիա
Իսրայելի վարչապետ Բինյամին Նեթանյահուն հայտնել է, որ ռազմաօդային ուժերի ինքնաթիռները թիրախներ են խոցել Սիրիայում՝ լիբանանյան «Հեզբոլլահ» շարժման ձեռքը ժամանակակից զենքի ընկնելը կանխելու համար: Վարչապետի գրասենյակի հայտարարությունը տարածվել է ուրբաթ օրը, հայտնում է lenta.ru-ն:
«Մեր քաղաքականությունը հետևողական է. «Հեզբոլլահին» ժամանակակից զենքի փոխանցման փորձերը հայտնաբերելու դեպքում, և եթե ունենք հետախուզական տվյալներ, եթե ունենք օպերատիվ հնարավորություն, մենք աշխատանք ենք տանում իրադարձությունների նման զարգացումը կանխելու համար»,- ընդգծել է Նեթանյահուն:
«Դա այն է, ինչ տեղի է ունեցել, և դա այն է, ինչ տեղի է ունենալու»,- հավելել է վարչապետը:
Սիրիա իսրայելական ավիացիայի «արշավանքի» մասին հայտնի էր դարձել ուրբաթ առավոտյան: Դամասկոսում հայտարարել են, որ չորս իսրայելական ինքնաթիռ խախտել է Սիրիայի օդային սահմանը, այդ ինքնաթիռներից մեկը կործանվել է ՀՕՊ ուժերի կողմից: Զինվորականների պնդմամբ՝ ևս մի ինքնաթիռ վնասվել է:
Նշվում էր, որ իսրայելական ավիացիայի նպատակը Պալմիրայի շրջանում սիրիացի ուժայինների օբյեկտներն էին:
Իսրայելի պաշտպանության բանակում հայտարարել էին, որ ինքնաթիռները բազա են վերադարձել առանց կորուստների, իսկ սիրիական հրթիռներից առնվազն մեկը որսացել է իսրայելական հակահրթիռային համակարգը:










